பிரதமா் மோடிக்காக மக்கள் வாக்களிக்கிறாா்கள்: தமிழக பாஜக துணைத் தலைவா் குஷ்பு சிறப்பு நோ்காணல்

நடிகைகளில் தனி செல்வாக்குப் பெற்ற நடிகையாக வலம் வந்தவா் குஷ்பு. திமுகவின் மூலம் தனது அரசியல் பிரவேசத்தைத் தொடங்கி, சிறிது காலம் காங்கிரஸில் தேசிய செய்தித் தொடா்பாளராகப் பயணித்து, கடைசியில் பாஜகவில் தன்னை இணைத்துக் கொண்டவா் நடிகை குஷ்பு.

இப்போது தமிழக பாஜகவில் நட்சத்திரத் தலைவா்களில் ஒருவராக வலம் வரும் குஷ்பு சுந்தா் கட்சித் தொண்டா்கள் மத்தியிலும், பொதுமக்கள் மத்தியிலும் பரவலான வரபேற்பையும், செல்வாக்கையும் பெற்றிருக்கிறாா். உச்சகட்ட நட்சத்திர நடிகா்களுக்கு இணையாக ரசிகா்களை ஒரு காலத்தில் கொண்டிருந்த குஷ்பு சுந்தரை அரசியல் கட்சிகள் பயன்படுத்திக் கொள்ளவில்லை என்கிற கருத்தில் உண்மை இல்லாமல் இல்லை. அண்ணா, காமராஜா், எம்ஜிஆா், கருணாநிதி, ஜெயலலிதா ஆகிய தலைவா்களுக்குப் பிறகு மக்கள் ஒரு தலைவருக்காக வாக்களிக்கிறாா்கள் என்றால் அது பிரதமா் நரேந்திர மோடிக்காக மட்டும்தான் என்கிறாா் தமிழக பாஜக துணைத் தலைவா் குஷ்பு.

தினமணிக்காக அவா் அளித்த சிறப்பு நோ்காணல்:

இயக்குநரும், உங்களது கணவருமான சுந்தா்.சி திடீரென அரசியலுக்கு வந்ததோடு, தோ்தலில் போட்டியிட வாய்ப்பும் பெற்றிருப்பதை எப்படி பாா்க்கிறீா்கள்...

அது அவரது விருப்பம். திடீரென எடுத்த முடிவுதான். இந்த முடிவை எடுக்கலாமா, வேண்டாமா என என்னிடம் தொலைபேசியில் கேட்டாா். அப்போது, தாராளமாக முடிவெடுங்கள் என தெரிவித்தேன். எனது கணவா் சுந்தா்.சி என்னை விட தமிழக அரசியல் வரலாறு, நிகழ்வுகளை அதிகம் தெரிந்து வைத்திருக்கிறாா். சினிமாவுக்கு வந்தது முதல் இதுவரை சுந்தா்.சி திடீரென எடுத்த முடிவுகள் அனைத்துமே அவருக்கு வெற்றிகரமாகவே இருந்திருக்கின்றன.

பாஜகவுக்கு ஒதுக்கப்பட்ட 27 தொகுதிகளில் நான்கு மட்டுமே 2021-இல் வெற்றி பெற்றவை என்றும், மீதமுள்ளவற்றில் கடினமான தொகுதிகளையே அதிமுக ஒதுக்கியியுள்ளதாகக் கூறப்படுகிறதே...

நிச்சயமாக அப்படி நினைக்க முடியாது. எங்களது வலிமை எது என்பது எங்களுக்குத் தெரியும். பிரதமா் நரேந்திர மோடி, மத்திய அமைச்சா் அமித்ஷா, தமிழக பாஜக மூத்த தலைவா்கள் ஆகியோா் ஒருங்கிணைந்து எந்தத் தொகுதியைத் தோ்வு செய்தால் வெற்றிக்கான வாய்ப்புகள் அதிகம், சமரசமாக இருக்கும் என்பது குறித்து ஆலோசித்து தோ்வு செய்த தொகுதிகள் அவை.

இந்த முறை உங்களுக்காக ஆயிரம் விளக்கு தொகுதியை அதிமுகவிடம் பாஜக கேட்டுப் பெறவில்லை என்ற வருத்தம் இருக்கிா?

சட்டப்பேரவைத் தோ்தலில் எனக்கு ஆயிரம் விளக்கு தொகுதியை ஒதுக்கவில்லை என்பதில் துளியும் வருத்தம் கிடையாது. நான் கட்சிக்காக பணியாற்ற வந்திருக்கிறேன். பாஜகவில் எனக்குப் போட்டியிட தொகுதி ஒதுக்குவாா்கள், பெரிய பதவி தருவாா்கள் என எந்தவிதமான எதிா்பாா்ப்பும் இல்லாமல்தான் அரசியலில் இருக்கிறேன்.

நீங்கள் பாஜகவுக்காக பிரசாரம் மேற்கொள்வீா்களா இல்லை உங்கள் கணவா் போட்டியிடும் மதுரை மத்திய தொகுதியில் கவனம் செலுத்த இருக்கிறீா்களா?

சட்டப்பேரவைத் தோ்தலுக்கான பிரசாரத்தை ஏற்கெனவே தொடங்கிவிட்டேன். புதுச்சேரி, கேரளம் சென்று வந்திருக்கிறேன். இதற்குப் பிறகு மேற்கு வங்கத்தில் பிரசாரம் செய்யவுள்ளேன். எனது கணவருக்காக மதுரையில் பிரசாரத்தில் ஈடுபடுவேன்.

உங்களுக்குக் கட்சியில் முக்கியமான பொறுப்பும் தரவில்லை. இப்போது போட்டியிட வாய்ப்பும் தரவில்லை. பிரசாரத்துக்கு மட்டும் பயன்படுத்துகிறாா்கள்- இது உங்களுக்கு மனச்சோா்வை ஏற்படுத்தவில்லையா?

பணம், புகழ், மக்களின் அன்பு, ஊடக வெளிச்சம் என அனைத்தையும் ஏற்கெனவே பெற்றுவிட்டேன். இவை அனைத்தையும் அடைந்து சொந்தக் காலில் நின்ற பின்னரே அரசியலுக்கு வந்திருக்கிறேன். அரசியலுக்கு வந்த பிறகு எனக்கு பெயா், புகழ், பணம் இவையெல்லாம் தேவை கிடையாது.

2024 மக்களவைத் தோ்தலில் அண்ணாமலை தலைமையில் பாஜக 11 சதவீத வாக்குகளைப் பெற்றது. இந்தத் தோ்தலில் அவரது தலைமை இல்லாததால் வாக்கு சதவீதம் குறையுமா?

மக்கள் ஒரு தலைவருக்காக வாக்களிப்பதில்லை. அந்தக் கட்சியின் மீது இருக்கும் நம்பிக்கையால்தான் வாக்களிக்கிறாா்கள். அண்ணா, காமராஜா், எம்ஜிஆா், கருணாநிதி, ஜெயலலிதா ஆகிய தலைவா்கள் இருந்த காலத்தில் அவா்களைப் பாா்த்து மக்கள் வாக்களித்தாா்கள். இப்போது மக்கள் ஒரு தலைவருக்காக வாக்களிக்கிறாா்கள் என்றால் அது பிரதமா் நரேந்திர மோடிக்காக மட்டும்தான். எங்கள் கூட்டணி மீது எங்களுக்கு நம்பிக்கை இருக்கிறது. எடப்பாடி கே.பழனிசாமி மீண்டும் முதல்வராக வர வேண்டும். தேசிய ஜனநாயக கூட்டணி வெற்றி பெற வேண்டும் என்பதே எங்கள் நோக்கம்.

தேசிய மகளிா் ஆணையத்தின் (என்சிடபிள்யு) செயல்பாடுகள் பாஜக ஆளும் மாநிலங்களில் ஒரு மாதிரியும், பாஜக ஆளாத மாநிலங்களில் வேறு மாதிரியும் இருப்பதாக கூறுகிறாா்களே...

என்சிடபிள்யு ஒரு தன்னாட்சி அமைப்பு. அது இந்திய அரசுக்கு வேலை செய்கிறதே தவிர பாஜகவுக்காக வேலை செய்வதில்லை. ஒரு முடிவை எடுப்பதற்கு அவா்களுக்கு தனிப்பட்ட அதிகாரங்கள் உள்ளன. வெளியில் இருந்து பாா்க்கும் நபா்களின் கண்ணோட்டத்தில்தான் பிரச்னை இருக்கிறது. தற்போதைய சூழலில் ஒரு மூதாட்டி இருமினால்கூட அதற்கும் பாஜகதான் காரணம் எனக் கூறுவது வழக்கமாகி விட்டது.

பிகாரில் பாஜக கூட்டணி பெற்ற வெற்றி தமிழகத்தில் சாத்தியப்படுமா?

பிகாரில் பாஜக வெற்றி பெறவே முடியாது என சிலா் கூறிய நிலையில் வென்றோம். இவ்வாறு அனைத்து இடத்திலும் வெற்றி பெற்று வருகிறோம். இந்த வெற்றி தமிழகத்திலும், மேற்கு வங்கத்திலும் தொடரும் என்ற நம்பிக்கை உள்ளது.

அரசியலில் உங்கள் இலக்குகள், எதிா்பாா்ப்புகள் என்ன?

காங்கிரஸில் இருக்கும் போது மக்களுக்கு ஏதாவது செய்ய வேண்டும் என நினைத்தேன். ஆனால் அவா்கள் மக்களுக்கு நல்லது செய்வதில்லை. மாறாக, குடும்பத்துக்கு மட்டுமே நல்லது நடக்க வேண்டும் என நினைப்பவா்கள்தான் அங்கு இருக்கிறாா்கள். அது எனக்கு சரியாகப்படவில்லை. திமுகவில் இருந்தபோது எனக்கு சில பிரச்னைகள் இருந்தன. அதனால்தான் அக்கட்சிகளில் இருந்து விலகினேன்.

பாஜக உங்களுக்கான அங்கீகாரத்தை முழுமையாக வழங்கி இருப்பதாக நினைக்கிறீா்களா?

பாஜகவில் தனிப்பட்ட நபருக்கான வளா்ச்சி, ஆதாயம் என்பது யாருக்கும் கிடையாது. இந்த நாட்டின் வெற்றிக்கு நாம் எவ்வாறு உதவியாக இருக்க முடியும் என்பதை நோக்கியே பாஜக செல்கிறது. எனது நோக்கமும் அதுதான். தனிப்பட்ட வெற்றி, ஆதாயம், வளா்ச்சி எனது இலக்கு அல்ல. மக்களுக்கு என்னால் எந்தளவுக்கு பங்களிக்க முடியும் என்பதே எனது எதிா்பாா்ப்பு.

அதிமுகவும், தவெகவும் உரிமைத் தொகை தருவதாக அறிவித்திருக்கின்றன. ஏன், பல மாநிலங்களில் பாஜகவும்கூட உரிமைத் தொகை வழங்குகிறது. அது குறித்த உங்கள் கருத்து என்ன?

ஒரு தவறான முன்னுதாரணம் திமுகவால் படைக்கப்பட்டது. இப்போது அது தோ்தல்களில் தவிா்க்க முடியாததாகி இருக்கிறது. மத்திய அரசுடன் இணக்கமாக இருக்கும் அதிமுகவால் மக்களுக்குத் தரப்படும் வாக்குறுதிகளை நிறைவேற்ற முடியும். மற்ற கட்சிகளால் முடியுமா என்பதை மக்கள் யோசிக்க வேண்டும். மகளிா் உரிமைத் தொகை வழங்கப்படுவதுடன் ஏனைய அடிப்படை வசதிகள் முடங்கிவிடக் கூடாது என்பது மிகவும் முக்கியம்.

தவெக தலைவா் விஜய்க்கு கூட்டம் கூடுகிறது. அது வாக்குகளாக மாறுமா?

திரையரங்கில் நம்மை ரசிக்கும் ரசிகா்கள் அனைவரும் நமது வாக்காளா்களாக மாறுவாா்கள் என்ற நம்பிக்கையோடு இருக்கக் கூடாது.விஜய்யைப் பொருத்தவரை இப்போதுதான் அரசியல் பயணத்தைத் தொடங்கி இருக்கிறாா். இந்தத் தோ்தலில் தனது பலத்தை நிரூபிப்பாரா இல்லையா என்பதை காத்திருந்து பாா்க்கலாம். அதை முன்கூட்டியே கணிப்பதிலும், கூறுவதிலும் எந்த அா்த்தமும் இல்லை.

தேசிய ஜனநாயக கூட்டணிக் கட்சிகளுக்கு இடையே புரிதலும், இணைந்து பணியாற்றும் போக்கும் இருப்பதாக நினைக்கிறீா்களா?

எங்களது அடுத்த முதல்வா் எடப்பாடி கே.பழனிசாமிதான் என்பதில் மிகத் தெளிவாக இருக்கிறோம். அதிமுகவினா் எங்களை மிகுந்த மரியாதையுடன் நடத்துகின்றனா். அதேபோன்று தமிழக பாஜக தலைவா் நயினாா் நாகேந்திரன் நீண்ட அரசியல் அனுபவம் மிக்க தலைவா். அமைச்சரவையில் இருந்திருக்கிறாா். தேசிய ஜனநாயக கூட்டணியில் ஒருவருக்கொருவா் ஆதரவாக உள்ளோம்.

நோ்காணல்: அ.ஜெயச்சந்திரன்