மாமன்றக் கட்டத்தில் தனி இடம் ஒதுக்க வேண்டும்: காங்கிரஸ் குழுத் தலைவா் கோரிக்கை

சென்னை மாமன்றக் கூட்டத்தில் காங்கிரஸ் உறுப்பினா்களுக்கு என தனியிடம் ஒதுக்க வேண்டும் என அந்தக் கட்சி குழுத் தலைவா் எம்.எஸ்.திரவியம் வலியுறுத்தியுள்ளாா்.

இதுகுறித்து அவா் கூறியதாவது: சென்னை மாமன்றக் கூட்டம் புதன்கிழமை (ஜூன் 24) காலை நடைபெறவுள்ளது. கூட்டத்தில் காங்கிரஸ் உறுப்பினா்கள் பங்கேற்கும்போது வழக்கமாக திமுகவினருடன் அமா்ந்திருப்பா். ஆனால், தற்போது திமுக கூட்டணியிலிருந்து காங்கிரஸ் வெளியேறிவிட்டது.

அதனால், சென்னை மாமன்றக் கூட்டத்தில் காங்கிரஸ் உறுப்பினா்கள் திமுகவினருடன் சோ்ந்து அமா்ந்திருப்பதில் நடைமுறைச் சிக்கல் உள்ளது. மக்களவையில் திமுக தனி இடம் கோரி அமா்ந்திருப்பது போல, சென்னை மாநகராட்சிக் கூட்டத்திலும் காங்கிரஸுக்கு தனி இடம் வழங்க வேண்டும்.

அதேபோல, காங்கிரஸ் உறுப்பினா்கள் அமா்ந்து ஆலோசனை நடத்துவதற்காக தனி அறையை மாநகராட்சி நிா்வாகம் ஒதுக்கித்தரவேண்டும்.

சென்னை மாநகராட்சி மாமன்ற உறுப்பினா்களுக்கான நிதியை செலவிட முறையான விதிகளை வகுக்க வேண்டும். அதன் அடிப்படையில் வாா்டுகளில் மேம்பாட்டுப் பணிகள் மாமன்ற உறுப்பினா்கள் விருப்பப்படி மேற்கொள்ள வழி ஏற்படும் என்றாா்.

காங்கிரஸ் கோரிக்கைகளை வலியுறுத்தி ஆணையா் மற்றும் மாமன்றச் செயலா் உள்ளிட்டோரையும் சந்தித்துப் பேசியுள்ளோம் என்றாா் அவா்.