காவலர் வீட்டின் பூட்டை உடைத்து 15 சவரன் நகை திருட்டு

திருப்போரூர் அருகே காவலர் வீட்டின் பூட்டை உடைத்து 15 சவரன் நகை மற்றும் ரூ. 40 ஆயிரம் ரொக்கத்தை மர்ம நபர்கள் திருடிச் சென்றனர். 
திருப்போரூரை அடுத்த மாம்பாக்கம் அருகே மேலைக்கோட்டையூர் பகுதியில் காவலர் குடியிருப்பில் வசிப்பவர் தேசிங்கு ராஜன் (43). இவர், செவ்வாய்க்கிழமை வீட்டைப் பூட்டிவிட்டு பணிக்குச் சென்றுவிட்டு, மாலை வீடு திரும்பினார். 
அப்போது, வீட்டின் பூட்டு உடைக்கப்பட்டு கிடந்தது. உள்ளே பீரோ உடைக்கப்பட்டு, அதிலிருந்த 15 சவரன் நகை மற்றும் ரூ. 40ஆயிரம் ரொக்கத்தை மர்ம நபர்கள் திருடிச் சென்றது தெரியவந்தது. இதுகுறித்து தாழம்பூர் போலீஸார் வழக்குப் பதிவு செய்து விசாரித்து வருகின்றனர்.