பாதிக்கப்படும் மக்கள் தங்களின் உரிமைக்காகப் போராடலாம்: செ.கு.தமிழரசன்

பாதிக்கப்படும் பொதுமக்கள் தங்களின் உரிமைகளுக்காகப் போராடலாம் என்று இந்திய குடியரசு கட்சித் தலைவா் செ.கு.தமிழரசன் தெரிவித்தாா்.

காஞ்சிபுரம் மாவட்டம், பரந்தூா் மற்றும் அதன் சுற்றுவட்டாரப் பகுதிகளில் சுமாா் 4,750 ஏக்கா் பரப்பளவில் சென்னையின் இரண்டாவது விமான நிலையம் அமைக்கப்படும் என மத்திய-மாநில அரசுகள் அறிவிப்பு செய்துள்ளன.

இந்த நிலையில், புதிய விமான நிலையம் அமைக்க எதிா்ப்புத் தெரிவித்து, தொடா்ந்து 73-ஆவது நாளாகப் போராட்டத்தில் ஈடுபட்டு வரும் ஏகனாபுரம் கிராம மக்களை இந்திய குடியரசு கட்சித் தலைவா் செ.கு.தமிழரசன் வெள்ளிக்கிழமை சந்தித்து போராட்டத்துக்கு ஆதரவு தெரிவித்துப் பேசியது:

பரந்தூா் பகுதியில் விமான நிலையம் அமைத்து, அதை யாரிடம் ஒப்படைப்பாா்கள் என்பதை நீங்களே புரிந்துக் கொள்ளுங்கள். வாழ்விடத்தை, விளை நிலத்தை இழந்து மக்கள் என்ன செய்வாா்கள்?. தங்களின் உரிமைகளுக்காக சட்டப்பேரவை, நாடாளுமன்றம் மட்டுமல்ல, ஐநா சபை வரை கூட சென்று போராடும் உரிமை பாதிக்கப்பட்ட மக்களுக்கு உள்ளது.

நாள்தோறும் எப்படி விடியுமோ என்ற கவலையில் முதல்வா் உள்ளாா். அதேபோலத்தான, விமான நிலையத்துக்கு எதிா்ப்புத் தெரிவிக்கும் மக்களின் நிலையும் உள்ளது என்றாா்.