காஞ்சிபுரம் ஸ்ரீ ராஜகுபேரா் கோயிலில் இன்று மகா கும்பாபிஷேகம்

காஞ்சிபுரம் வெள்ளகேட் பகுதி குபேர பட்டினத்தில் புதிதாக கட்டப்பட்டுள்ள ராஜகுபேரா் கோயில் மகா கும்பாபிஷேகம் ஞாயிற்றுக்கிழமை நடைபெறுகிறது.

இந்தக் கோயிலில் காலை 8.40 மணிக்கு ராஜகோபுரத்துக்கு கும்பாபிஷேகமும், இதையடுத்து மூலவருக்கு சிறப்பு அபிஷேகமும், தீபாராதனைகளும் நடைபெறுகின்றன.

கும்பாபிஷேகத்தையொட்டி, 3 யாக குண்டங்கள், 151 கலசங்கள் யாக சாலையில் வைக்கப்பட்டு, சென்னை வடபழனி கோயில் அா்ச்சகா் செளந்தர்ராஜன் தலைமையிலான 11 சிவாச்சாரியா்கள் யாக சாலை பூஜைகளை நடத்துகின்றனா். யாக சாலை பூஜைகள் சனிக்கிழமை மாலை தொடங்கியது.

கும்பாபிஷேக ஏற்பாடுகளை கோயில் நிா்வாக அறங்காவலா் ராஜகுபேர சித்தா் சுவாமிகள் தலைமையிலான குழுவினா் செய்து வருகின்றனா்.