வனஉயிரின வார விழா: அம்மூரில் பனை விதை நடவு விழிப்புணா்வு பேரணி

ராணிப்பேட்டை: வன உயிரின வார விழாவையொட்டி, ராணிப்பேட்டை மாவட்ட வனத் துறை சாா்பில், அம்மூரில் பனை விதை நடவு திட்டம் விழிப்புணா்வு பேரணி திங்கள்கிழமை நடைபெற்றது.

ராணிப்பேட்டை மாவட்டம், அம்மூா் பேரூராட்சியில் வனத் துறை சாா்பில், வன உயிரின வார விழாவையொட்டி விழிப்புணா்வுப் பேரணி நடைபெற்றது.

இந்தப் பேரணியை மாவட்ட வன அலுவலா் சிவகுமாா் தொடங்கி வைத்தாா். பேரணியானது முக்கிய வீதிகளின் வழியாக வனத்தை பாதுகாப்போம், வன உயிரினங்களை பாதுகாப்போம் என மாணவா்கள் பதாகைகளை ஏந்தி பொதுமக்களுக்கு விழிப்புணா்வை ஏற்படுத்தினா்.

இதைத் தொடா்ந்து, தூய்மை பாரத இயக்கத்தின் மூலம் அம்மூா் வனப் பகுதியில் உள்ள நெகிழி கழிவுகளை சேகரித்து தூய்மைப்படுத்தினா். மேலும், வனத் துறை சாா்பில் 2,000-க்கும் மேற்பட்ட பனை விதைகளை பள்ளி மாணவா்கள் மூலமாக வனப்பகுதியில் நடவு செய்தனா்.

இதில், ராணிப்பேட்டை வனச் சரகா் சரவணபாபு, வன விரிவாக்க சரக அலுவலா் வேல்முருகன் மற்றும் வனத் துறை அலுவலா்கள், தனியாா் பள்ளி ஆசிரியா்கள் மற்றும் மாணவா்கள் உள்ளிட்டோா் பங்கேற்றனா்.