நகராட்சிக்கு வாடகை செலுத்தாத 13 கடைகளுக்கு "சீல்'

பூந்தமல்லி நகராட்சிக்கு ஓராண்டாக வாடகை செலுத்தாத 13 கடைகளுக்கு திங்கள்கிழமை "சீல்' வைக்கப்பட்டது.

பூந்தமல்லி பேருந்து நிலையத்தில் நகராட்சிக்குச் சொந்தமான 37 கடைகள் தனியாருக்கு வாடகை விடப்பட்டுள்ளது.

இதில் 21 கடைகளின் வாடகைதாரர்கள் கடந்த ஓராண்டாக்கும் மேலாக வாடகைக் கட்டணத்தை நகராட்சியில் செலுத்தாமல் இருந்துள்ளனர். இதனால் நகராட்சிக்கு வரவேண்டிய ரூ. 18 லட்சத்து 16 ஆயிரம் வாடகை பணம் வராமல் நிலுவையில் இருந்துள்ளது.

வாடகைப் பணத்தை செலுத்துமாறு நகராட்சி சார்பில் நோட்டீஸ் வழங்கப்பட்டு வந்ததாகக் கூறப்படுகிறது. ஆனால் வாடகைதாரர்கள் பணத்தை செலுத்தாததால் போலீஸார் பாதுகாப்புடன் திங்கள்கிழமை சென்ற நகராட்சி நிர்வாகத்தினர் வாடகைப் பணம் செலுத்தாத கடைகளுக்கு "சீல்' வைக்கத் தொடங்கினர்.

அப்போது நிலுவையில் இருந்த 8 கடைகளின் வாடகை உடனடியாகச் செலுத்தப்பட்டது. இதனால் ரூ. 2 லட்சத்து 6 ஆயிரம் வாடகைப் பணம் வசூலானது. மேலும் வாடகை செலுத்தாத 13 கடைகளுக்கு "சீல்' வைக்கப்பட்டது.