விடுதலைச் சிறுத்தைகள் ஆர்ப்பாட்டம்

அம்பேத்கர் சிலையை அகற்றியதை கண்டித்து, குன்றத்தூரில் ஆர்ப்பாட்டத்தில் ஈடுபட்ட விடுதலைச் சிறுத்தைகள் கட்சியைச் சேர்ந்த 90 பேரை போலீஸார் சனிக்கிழமை கைது செய்தனர்.

குன்றத்தூரை அடுத்த இரண்டாம் கட்டளை பகுதியில் தனியாருக்குச் சொந்தமான இடத்துக்குச் செல்லும் பொதுவழியில், அப்பகுதியைச் சேர்ந்த சிலர் கடந்த சில தினங்களுக்கு முன்பு அனுமதியின்றி அம்பேத்கர் சிலையை அமைத்தனர். இதனால், அந்தச் சிலையை அமைத்த 5 பேரை குன்றத்தூர் போலீஸார் கைது செய்தனர். மேலும், அந்தச் சிலையை வருவாய்த் துறையினரும், போலீஸாரும் இணைந்து அகற்றினர்.

இதை கண்டித்து, விடுதலைச் சிறுத்தைகள் கட்சியின் ஒன்றிய அமைப்பாளர் பரணி மேகா தலைமையில் நூற்றுக்கும் மேற்பட்டோர் குன்றத்தூர் பேருந்து நிலையம் அருகே சனிக்கிழமை திரண்டு ஆர்ப்பாட்டத்தில் ஈடுப்பட்டனர்.

இதில், காஞ்சிபுரம் மாவட்டச் செயலாளர் விடுதலை செழியன் கலந்து கொண்டு கண்டன உரையாற்றினார்.

இதையடுத்து, அனுமதியின்றி ஆர்ப்பாட்டத்தில் ஈடுப்பட்டதாக விடுதலைச் சிறுத்தைகள் கட்சியைச் சேர்ந்த 90 பேரை குன்றத்தூர் போலீஸார் கைது செய்தனர். பின்னர், மாலையில் அவர்கள் விடுவிக்கப்பட்டனர்.