படிக்க விருப்பம் தெரிவித்த சிறுவனுக்கு உதவிய வட்டாட்சியர்..!

பள்ளியில் படிக்க விருப்பம் தெரிவித்து காவல் நிலையத்திற்கு வந்த சிறுவனை போலீஸார் அலைக்கழித்ததாகவும், இதை அறிந்த வட்டாட்சியர் தமிழ்ச் செல்வன், சிறுவன் படிப்பதற்கு ஏற்பாடு செய்ததாகவும் சமூக ஆர்வலர்கள் தெரிவித்தனர். 
திருவள்ளூர் பூங்கா நகரைச் சேர்ந்த செல்வகுமாரின் மகன் சங்கர்(13). இவரது தாயார் லட்சுமி தையல் தொழிலாளியாக உள்ளார். குடும்பப் பிரச்னையால் தந்தை தனியாக பிரிந்த நிலையில், சங்கர் தாயாருடன் வசித்து வருகிறார். 
இந்நிலையில், ஏகாட்டூரில் உள்ள ஊராட்சி ஒன்றிய நடுநிலைப்பள்ளியில் 7-ஆம் வகுப்பு படித்து வந்த சங்கரை அவரது தாயார் வேப்பம்பட்டில் உள்ள இருசக்கர வாகன பழுது நீக்கும் கடைக்கு வேலைக்கு அனுப்பி உள்ளார். படிக்க விரும்பிய சங்கர் வேலைக்குப் போக மறுத்ததால், தாயார் அவனை அடித்து துன்புறுத்தியும் உள்ளார்.
இது குறித்து திருவள்ளூர் கிராமிய காவல் நிலையத்தில் புகார் தெரிவித்தால் பிரச்னை தீரும் என்றும், அதன் மூலம் மீண்டும் பள்ளிக்குச் செல்லலாம் என்ற நோக்கத்தில் சங்கர் போலீஸாரிடம் சென்றுள்ளார். இதற்கு அங்கிருந்த காவலர்கள் இது எங்கள் விவகார எல்லை எனக் கூறி, செவ்வாப்பேட்டைக்கு அனுப்பி வைத்துள்ளனர். அவர்களோ இது எங்கள் பகுதி இல்லையெனக் கூறி கடம்பத்தூர் காவல் நிலையத்தில் புகார் தெரிவிக்குமாறு அலைக்கழிப்புச் செய்துள்ளனர். 
படிக்க விருப்பம் தெரிவித்த மாணவனை போலீஸார் அலைக்கழிப்புச் செய்வதைக் கண்ட சமூக ஆர்வலர்கள் வருத்தம் அடைந்து, வட்டாட்சியர் தமிழ்செல்வனிடம் சங்கரை ஒப்படைத்தனர். 
அதைத் தொடர்ந்து, வட்டாட்சியர் அந்த மாணவனுக்கு புத்தாடைகள் வாங்கிக் கொடுத்ததோடு, சேவாலயா பள்ளியில் சேர்த்து விடுவதாகவும் உறுதியளித்தார். தொடர்ந்து, வட்டாட்சியரின் உதவியினால் மாவட்ட குழந்தைகள் நல அலுவலர் செந்தில்குமாரிடம் சங்கரை ஒப்படைத்தனர்.