திமுக சார்பில் ஊராட்சி சபைக் கூட்டம்

திருவள்ளூர் அருகே திமுக சார்பில் நடத்தப்பட்ட ஊராட்சி சபைக் கூட்டத்தில் தெருவிளக்கு வசதி உள்ளிட்ட அடிப்படை வசதிகள் செய்து தரக்கோரி கோரிக்கை மனுக்களை சட்டப்பேரவை உறுப்பினர் வி.ஜி.ராஜேந்திரனிடம் அளித்தனர். 
திமுக சார்பில் ஒவ்வொரு கிராமத்திலும் பொதுமக்களை நேரில் சந்தித்து குறைகளைக் கேட்டறியும் வகையில்     ஊராட்சி சபைக் கூட்டம் நடத்த அக்கட்சியின் தலைவர் மு.க.ஸ்டாலின் நிர்வாகிகளுக்கு வலியுறுத்தியுள்ளார். இதன் அடிப்படையில் திருவள்ளூர் தெற்கு மாவட்டம் திமுக சார்பில் ஒவ்வொரு கிராமத்திலும் ஊராட்சி சபைக் கூட்டம் நடத்தி வருகின்றனர். 
இந்நிலையில் கடம்பத்தூர் கிழக்கு ஒன்றியம் சார்பில் ராமன்கோயில் கிராமத்தில் ஊராட்சி சபைக் கூட்டம் புதன்கிழமை நடைபெற்றது. இந்தக் கூட்டத்துக்கு திருவள்ளூர் சட்டப்பேரவை உறுப்பினர் வி.ஜி.ராஜேந்திரன் தலைமை வகித்தார்.
அப்போது, பொதுமக்கள் இக்கிராமத்தில் குடிநீர் பற்றாக்குறையைத் தீர்க்க ஆழ்குழாய் கிணறு, கால்வாய் சீரமைப்பு, தெருவிளக்கு வசதி, சிமென்ட் சாலை வசதி செய்து தர வேண்டும் என வலியுறுத்தினர். பின்னர் பொதுமக்களிடம் இருந்து மனுக்களை அவர் பெற்றுக் கொண்டார். 
இந்த மனுக்கள் மீது கட்டாயம் நடவடிக்கை எடுப்பதாக அவர் உறுதியளித்தார். 
அதேபோல் கடம்பத்தூர் ஒன்றியத்தில் உள்ள பிரியாங்குப்பம், விடையூர், செஞ்சி, சிற்றம்பாக்கம், காவாங்கொளத்தூர் ஆகிய கிராமங்களில் நடைபெற்ற ஊராட்சி சபைக்கூட்டங்களிலும் பொதுமக்கள் ஆர்வத்துடன் கலந்து கொண்டனர். 
இதற்கான ஏற்பாடுகளை கடம்பத்தூர் ஒன்றிய செயலர் அரி உள்ளிட்ட அக்கட்சியினர் செய்திருந்தனர்.