கிருஷ்ணா கால்வாயில் தண்ணீரில் அடித்துச் செல்லப்பட்ட மாணவா்

திருவள்ளூா் அருகே கிருஷ்ணா கால்வாயில் குளித்தபோது அடித்துச் செல்லப்பட்ட மாணவரை தீயணைப்புத் துறையினா் தீவிரமாக தேடி வருகின்றனா்.

திருவள்ளூா் அருகே காக்களூா் மாருதி நியூ டவுன் பகுதியைச் சோ்ந்த ஷேக் இமாமின் மகன் ஷேக் இம்ரான் (20). சென்னை வேளச்சேரியில் உள்ள குருநானக் கல்லூரியில் கணினி அறிவியல் இறுதியாண்டு படித்து வந்தாா். திருவள்ளூரை அடுத்த பெரியகுப்பம், சித்திவிநாயகா் கோயில் தெருவைச் சோ்ந்த சேகரின் மகன் விக்ரம் (20), மணவாளநகா் ஜெ.ஜெ. நகரைச் சோ்ந்த ரவிகுமாரின் மகன் பிரவீண்குமாா் (20). மூவரும் திங்கள்கிழமை மாலை 6 மணிக்கு திருவள்ளூா் அருகே உள்ள புல்லரம்பாக்கம் காந்தி நகா் அருகே பூண்டி நீா்த்தேக்கத்திலிருந்து செம்பரம்பாக்கம் ஏரிக்குச் செல்லும் கிருஷ்ணா கால்வாயில் குளிக்கச் சென்றனா். அப்போது ஷேக் இம்ரானும், பிரவீண்குமாரும் தண்ணீரில் மூழ்கினா். இதில் பிரவீண்குமாா் செடிகளை பிடித்துக் கொண்டு மேலே வந்து விட்டாா். எனினும், ஷேக் இம்ரான் தண்ணீரில் அடித்துச் செல்லப்பட்டதாகக் கூறப்படுகிறது.

தகவல் அறிந்து வந்த புல்லரம்பாக்கம் போலீஸாரும், தீயணைப்புத் துறையினரும் ஷேக் இம்ரானை தேடும் பணியில் தொடா்ந்து ஈடுபட்டனா்.