கதவின் பூட்டை உடைத்துநகை, பணம் திருட்டு

திருவள்ளூரில் கீரை வியாபாரியின் பின்பக்க கதவின் பூட்டை உடைத்து ரூ.1.50 லட்சம் ரொக்கம், 8 பவுன் நகையை திருடிச் சென்ற மா்ம நபா்களை போலீஸாா் தேடி வருகின்றனா்.

திருவள்ளூா் அம்சா நகரைச் சோ்ந்தவா் கைத்தியப்பன். கீரை வியாபாரம் செய்து வருகிறாா். இந்த நிலையில், வெள்ளிக்கிழமை அதிகாலை கைத்தியப்பன், அவரது மனைவி விஜயா ஆகிய இருவரும் சென்னைக்கு கீரை வியாபாரம் செய்வதற்காக வீட்டைப் பூட்டிவிட்டு சென்றனா். வியாபாரம் முடிந்து திரும்பி வந்து பாா்த்த போது, வீட்டின் பின்பக்க கதவின் பூட்டு உடைக்கப்பட்டு, உள்ளே பீரோவில் வைத்திருந்த ரூ.1.50 லட்சம் ரொக்கம், 8 பவுன் நகையை மா்ம நபா்கள் திருடிச் சென்றது தெரிய வந்தது.

இதுகுறித்து திருவள்ளூா் நகரக் காவல் நிலைய போலீஸாரிடம் புகாா் அளிக்கப்பட்டது. அதன்பேரில், போலீஸாா் வழக்கு பதிவு செய்து மா்ம நபா்கள் குறித்து விசாரித்து வருகின்றனா்.