விவசாயி வீட்டில்  10 பவுன் நகை,  ரூ.62 ஆயிரம் திருட்டு

செய்யாறு அருகே விவசாயி வீட்டில் 10 சவரன் நகை, ரொக்கப் பணம் ரூ.62 ஆயிரத்தை மர்ம நபர்கள் திருடிச் சென்றனர்.
செய்யாறை அடுத்த கன்னிகாபுரம் கிராமத்தைச் சேர்ந்தவர் பிச்சாண்டி. விவசாயியான இவர், புதன்கிழமை காலை வீட்டை பூட்டிவிட்டு நிலத்திற்கு சென்று உள்ளார். 
இவரது மனைவி ஏரி வேலைக்கு சென்றதாகத் தெரிகிறது. மதியம் வீட்டிற்கு திரும்பி வந்த போது வீட்டின் கதவு திறந்த நிலையில் இருந்து உள்ளது. 
மேலும், பீரோவும் திறந்த நிலையிலும், அதில் வைத்திருந்த 10 பவுன் நகை, ரொக்கப் பணம் ரூ. 62 ஆயிரத்தை மர்ம நபர்கள் திருடிச் சென்று உள்ளனர்.  
இது குறித்த புகாரின் பேரில், மோரணம் போலீஸார் வழக்குப் பதிவு செய்து விசாரணை நடத்தி வருகின்றனர்.