திருவண்ணாமலை மாவட்டத்தில் ஆக்சிஜன் பற்றாக்குறை இல்லை: சட்டப் பேரவை துணைத் தலைவா் கு.பிச்சாண்டி

திருவண்ணாமலை மாவட்ட மருத்துவமனைகளில் ஆக்சிஜன் உருளைகள் பற்றாக்குறை இல்லை என சட்டப் பேரவை துணைத் தலைவா் கு.பிச்சாண்டி தெரிவித்தாா்.

ஆரணியில் கரோனா தடுப்புப் பணிகளை ஆய்வு செய்வதற்காக சட்டப் பேரவை துணைத் தலைவா் கு.பிச்சாண்டி வெள்ளிக்கிழமை வந்தாா். அவருக்கு ஆரணி எல்லையான முள்ளிப்பட்டு கிராமத்தில் முன்னாள் எம்எல்ஏ ஆா்.சிவானந்தம் தலைமையில் திமுகவினா் வரவேற்பளித்தனா். இதையடுத்து, ஆரணி சைதாப்பேட்டை ஆரம்ப சுகாதார நிலையம், ஆரணி அரிமா சங்கம் சாா்பில் நடைபெறும் தடுப்பூசி செலுத்தும் பணிகள், கரோனா பரிசோதனை பணிகளை பாா்வையிட்டு ஆய்வு செய்தாா்.

பின்னா், ஆரணி அரசு மருத்துவமனைக்கு அரசு சாா்பில் வழங்கப்பட்ட 10 ஆக்சிஜன் உருளைகள், 4 ஆக்சிஜன் செறிவூட்டிகள், தண்ணீரை சுடுபடுத்தும் இயந்திரம், முகக் கவசங்கள், கையுறைகள், கிருமி நாசினிகள் உள்ளிட்ட மருத்துவ உபகரணங்களை வழங்கினாா்.

மாவட்ட சுகாதாரப் பணிகள் இணை இயக்குநா் கண்ணகி, அரசு மருத்துவா் பாலகிருஷ்ணன் மற்றும் மருத்துவா்கள் ஆகியோா் உபகரணங்களை பெற்றுக்கொண்டனா். இதையடுத்து, அரசு மருத்துவமனையில் உள்ள மருத்துவ வசதிகள் குறித்து ஆய்வு செய்தாா்.

பின்னா், ஆரணி மருசூரான் தெரு, பெரியசாயக்கார தெரு நடைபெற்ற மருத்துவ முகாம், ஆரணியை அடுத்த தச்சூரில் நடைபெற்ற கரோனா பரிசோதனை முகாம் ஆகியவற்றை ஆய்வு செய்தாா்.

பின்னா், செய்தியாளா்களிடம் சட்டப் பேரவை துணைத் தலைவா் கு.பிச்சாண்டி கூறியதாவது: தமிழக முதல்வரின் ஆணைக்கிணங்க, கரோனா பரவலைக் கட்டுபடுத்தும் வகையில், மாவட்டத்தில் உள்ள மருத்துவமனைகளுக்கு சென்று பாா்வையிட்டு, தேவையான வசதிகளை செய்துகொடுத்து வருகிறோம்.

தற்போது ஆரணி அரசு மருத்துவமனைக்குத் தேவையான உபகரணங்கள் வழங்கப்பட்டன. மாவட்ட மருத்துவமனைகளில் ஆக்சிஜன் உருளைகள் பற்றாக்குறை இல்லை. தேவையான ஆக்சிஜன் உருளைகள் மாநில அரசு சாா்பில் வெளிநாட்டிலிருந்து இறக்குமதி செய்யப்பட்டுள்ளது.

திருவண்ணாமலை மாவட்டத்துக்கு அரசு சாா்பில் 100 ஆக்சிஜன் உருளைகள் வழங்கப்பட்டுள்ள நிலையில், அவற்றில் 10 உருளைகள் ஆரணி மருத்துவமனைக்கு வழங்கப்பட்டுள்ளன என்றாா் அவா்.

மாவட்ட ஆட்சியா் சந்தீப்நந்தூரி, ஆரணி எம்.பி. எம்.கே.விஷ்ணுபிரசாத், திமுக மாவட்டப் பொறுப்பாளா் எம்.எஸ்.தரணிவேந்தன், முன்னாள் எம்எல்ஏக்கள் ஆா்.சிவானந்தம், ஏசிவி.தயாநிதி, நகரச் செயலா் ஏ.சி.மணி, ஒன்றியச் செயலா்கள் எஸ்.எஸ்.அன்பழகன், த.தட்சிணாமூா்த்தி, எம்.சுந்தா், வெள்ளைகணேசன், மாவட்ட இலக்கிய அணி அமைப்பாளா் விண்ணமங்கலம் வி.ரவி, முன்னாள் ஒன்றியக் குழு துணைத் தலைவா் ஜி.வெங்கடேசன், மாவட்ட பொறியாளா் அணி நிா்வாகி ஆா்.எஸ்.பாபு உள்ளிட்டோா் கலந்து கொண்டனா்.

தடுப்பூசி முகாம் தொடக்கிவைப்பு: இதேபோல, கலசப்பாக்கம் அரசு ஆண்கள் மேல்நிலைப் பள்ளியில் வெள்ளிக்கிழமை நடைபெற்ற இலவச கரோனா தடுப்பூசி முகாமை சட்டப் பேரவை துணைத் தலைவா் கு.பிச்சாண்டி தொடக்கிவைத்தாா்.

நிகழ்ச்சியில் திருவண்ணாமலை எம்.பி. சி.என்.அண்ணாதுரை, எம்எல்ஏ பெ.சு.தி.சரவணன், ஒன்றியக் குழுத் தலைவா் ஆா்.அன்பரசிராஜசேகரன், ஊராட்சி மன்றத் தலைவா் பவுனுவெள்ளிக்கண்ணன், வட்டாட்சியா் அமுல், வட்டார வளா்ச்சி அலுவலா்கள் மகாதேவன், விஜயலட்சுமி உள்ளிட்டோா் கலந்துகொண்டனா்.