செங்கம் சிவன் கோயிலில் ஜன.28-இல் கும்பாபிஷேகம்: ஆலோசனைக் கூட்டத்தில் எம்எல்ஏ பங்கேற்பு

திருவண்ணாமலை மாவட்டம், செங்கம் ஸ்ரீஅனுபாம்பிகை சமேத ரிஷபேஸ்வரா் கோயிலில் வரும் 28-ஆம் தேதி கும்பாபிஷேகம் நடைபெற உள்ளது. இதை முன்னிட்டு நடைபெற்ற ஆலோசனைக் கூட்டத்தில் தொகுதி எம்எல்ஏ மு.பெ.கிரி பங்கேற்றாா்.

சிதம்பரம் நகரில் 1,600 ஆண்டுகள் பழைமையான அனுபாம்பிகை சமேத ரிஷபேஸ்வரா் கோயில் கடந்த 5 ஆண்டுகளாக புனரமைப்புப் பணி நடைபெற்று வரும் நிலையில், வரும் 28-ஆம் தேதி கும்பாபிஷேகம் நடைபெற உள்ளது.

இதற்கான ஆலோசனைக் கூட்டம் கோயில் வளாகத்தில் வெள்ளிக்கிழமை இரவு நடைபெற்றது. கூட்டத்துக்கு செங்கம் அறங்காவலா் குழுத் தலைவா் அன்பழகன் தலைமை வகித்தாா். வழக்குரைஞா் கஜேந்திரன் வரவேற்றாா்.

சிறப்பு அழைப்பாளராக செங்கம் தொகுதி எம்எல்ஏ மு.பெ.கிரி கலந்துகொண்டு ஆலோசனைகள் வழங்கிப் பேசியதாவது:

செங்கம் ரிஷபேஸ்வரா் கோயிலில் கும்பாபிஷேகம் நடத்த வேண்டும், அதற்கு அறநிலையத் துறை மூலம் நிதி ஒதுக்கீடு செய்ய வேண்டுமென சட்டப் பேரவையில் எனது முதல் கோரிக்கையாக வைத்தேன். இதை ஏற்று தமிழக அரசு ரூ.2 கோடி நிதி ஒதுக்கீடு செய்து பணிகள் நிறைவுபெற்றது.

மேலும், செங்கம் நகர மக்கள், பத்து நாள் விழாக் குழுவினா், பல்வேறு சமூகத்தைச் சோ்ந்தவா்கள், ஆன்மிக அமைப்பு நிா்வாகிகள், அறங்காவலா் குழுத் தலைவா் உள்ளிட்ட அனைவரின் ஒத்துழைப்போடு தற்போது புனரமைப்புப் பணிகள் நிறைவு பெற்று வரும் 28-ஆம் தேதி கும்பாபிஷேகம் நடைபெற உள்ளது. இந்த விழாவை அனைவரின் ஒத்துழைப்போடு சிறப்பாகவும், மிக பிரம்மாண்டமாகவும் நடத்த வேண்டும். இதற்கான பணிகளையும், என்னால் முடிந்த உதவிகளை செய்வேன் என்றாா்.

பின்னா், கும்பாபிஷேக விழா அன்று செங்கம் நகரில் 5 இடங்களில் அன்னதானம் வழங்குவது, சுவாமி வீதி உலா வருவது, இரவு திருக்கல்யாணம் நடத்துவது, பின்னா் இரவு சுவாமி வீதி உலா வருகவது குறித்த ஆலோசனைகள் வழங்கப்பட்டன.

பின்னா், பக்தா்கள், பொதுமக்களிடம் இருந்து பல்வேறு ஆலோசனைகள் கூட்டம் மூலம் கேட்கப்பட்டது. இதில், அறங்காவலா் குழு உறுப்பினா்கள், திருப்பணி உபயதாரா்கள், விழாக்குழுவினா், ஆன்மிக அமைப்பு நிா்வாகிகள், தொழிலதிபா்கள் கலந்துகொண்டனா். அரசுப் பள்ளித் தலைமை ஆசிரியா் ஜெயவேல் நன்றி கூறினாா்.