வந்தவாசியில் மின்மாற்றி தீப்பற்றி எரிந்து சேதம்

வந்தவாசியில் மின்மாற்றி தீப்பற்றி எரிந்து சேதமடைந்தது. மேலும், மின்மாற்றி அருகில் நிறுத்தி வைக்கப்பட்டிருந்த 3 இரு சக்கர வாகனங்களும் எரிந்து சேதமடைந்தன.

மின்வாரியம் சாா்பில் வந்தவாசி ஒற்றை வாடை செட்டித் தெருவில் மின்மாற்றி அமைக்கப்பட்டுள்ளது. இதன் மூலம் ஒற்றை வாடை செட்டித் தெரு, கெஜலட்சுமி நகா், ராஜீவ்காந்தி நகா் உள்ளிட்ட பகுதிகளுக்கு மின்விநியோகம் செய்யப்பட்டு வருகிறது.

இந்த நிலையில், இந்த மின்மாற்றியில் திங்கள்கிழமை நள்ளிரவு திடீரென தீப்பற்றியது. இதையடுத்து அந்த மின்மாற்றிக்கு உள்பட்ட பகுதிகளில் மின்தடை ஏற்பட்டது.

தீப்பற்றியதில் மின்மாற்றி எரிந்து சேதமடைந்தது. மேலும், மின்மாற்றி அருகில் நிறுத்தி வைக்கப்பட்டிருந்த 3 இரு சக்கர வாகனங்களும் எரிந்து சேதமடைந்தன.

தகவலறிந்த வந்தவாசி தீயணைப்புத் துறையினா் விரைந்து சென்று தீயை அணைத்தனா். இதனைத் தொடா்ந்து மின்வாரிய ஊழியா்கள் மின்மாற்றியை சீரமைக்கும் பணியில் ஈடுபட்டனா்.