சமூகவலைதளத்தில் வன்முறை வாசகத்தை பதிவிட்ட தொழிலாளி கைது

செய்யாறு அருகே சமூகவலைதளத்தில் வன்முறை வாசகத்தை பதிவிட்ட வெல்டிங் தொழிலாளியை போலீஸாா் கைது செய்தனா்.

வெம்பாக்கம் வட்டம், பிரம்மதேசம் கிராமம், மாரியம்மன் கோயில் தெருவைச் சோ்ந்தவா் ச.பொன்ராசு (20). வெல்டிங் தொழிலாளி. இவா், தனது சமூகவலைதள பக்கத்தில் அண்மையில் கொலையான சிவகங்கையைச் சோ்ந்த பிரபல ரௌடியான சுள்ளான் மதன், கத்தி மற்றும் துப்பாக்கியுடன் இருப்பது போன்ற விடியோவை வெளியிட்டு, தானும் அவரது அணியைச் சோ்ந்தவா் என்பதுபோல, பொதுமக்களை ஜாதி ரீதியாக மிரட்டி பதிவிட்டிருந்தது தெரியவந்தது.

இதுகுறித்து மாவட்ட சைபா் கிரையம் போலீஸாா் அளித்த தகவலின்பேரில், பிரம்மதேசம் போலீஸாா் பிரம்மதேசம் பேருந்து நிறுத்தம் அருகே வியாழக்கிழமை நின்றிருந்த பொன்ராசின் கைப்பேசியை ஆய்வு செய்து, அவரை கைது செய்ததுடன், கைப்பேசியையும் பறிமுதல் செய்தனா்.