கைப்பேசியை பாா்த்து நேரத்தை வீணாக்கவேண்டாம்: மாணவா்களுக்கு ஆட்சியா் அறிவுறுத்தல்

கைப்பேசியை பாா்த்து நேரத்தை வீணாக்கவேண்டாம் என மாணவா்களுக்கு திருவண்ணாமலை ஆட்சியா் வந்தனா காா்க் அறிவுறுத்தினாா்.

திருவண்ணாமலை கலைஞா் கருணாநிதி அரசு கலைக் கல்லூரியில் இளையோா் இலக்கிய பயிற்சிப் பாசறை தொடக்க விழா வியாழக்கிழமை நடைபெற்றது.

தமிழ் வளா்ச்சித் துறை சாா்பில் நடைபெற்ற இந்த நிகழ்ச்சிக்கு கல்லூரி முதல்வா் இல.ரேவதி முன்னிலை வகித்தாா். தமிழ் வளா்ச்சித்துறை உதவி இயக்குநா்

ந.நிலா வரவேற்றாா்.

ஆட்சியா் வந்தனா காா்க் தலைமை வகித்து இளையோா் இலக்கியப் பயிற்சிப் பாசறையை தொடங்கி வைத்துப் பேசியதாவது:

மாணவா்கள் கைப்பேசியை பாா்த்து நேரத்தை வீணாக்க வேண்டாம். இன்றைய டிஜிட்டல் யுகத்தில் திரைகளை பாா்த்துக் கொண்டிருக்கும் நேரத்தைக் குறைத்து, இலக்கியத்தை நோக்கி உங்களைத் திருப்பும் இந்த முயற்சி மிகவும் பாராட்டுக்குரியது. இந்தச் சிறப்புப் பயிற்சிப் பாசறையில் பல்வேறு தலைப்புகளில் தமிழ் இலக்கிய வல்லுநா்கள் உரையாற்ற உள்ளனா். அந்த உரைகளையெல்லாம் கேட்டுத் தெளிவு பெற்று, மாணவா்கள் தங்களது திறமையை மேம்படுத்திக் கொள்ள வேண்டும்.

இந்தப் பாசறையில் வழங்கப்பட உள்ள அனைத்து அமா்வுகளிலும் முழு ஈடுபாட்டுடன் கலந்து கொள்ளுங்கள். உங்கள் சந்தேகங்களை அறிஞா்களிடம் கேட்டுத் தெரிந்து கொள்ளுங்கள். இந்த வாய்ப்பினை சரியாகப் பயன்படுத்தி, புதிய படைப்புகளை உருவாக்கி தமிழ் மொழியையும் நம் மாவட்டத்தையும் பெருமைப்படுத்த வேண்டும் என்றாா்.

இதனைத் தொடா்ந்து ஆசிரியா் சு.வேலாயுதம், ‘இலக்கியம் கற்போம்’ என்ற தலைப்பிலும், ஓய்வு பெற்ற தலைமை ஆசிரியா் ப.குப்பன், ‘வாழ்க்கைக்கு வழிகாட்டும் திருக்கு’ என்ற தலைப்பிலும், உதவிப் பேராசிரியா் சு.பிரேம்குமாா், ‘திருவண்ணாமலை மாவட்ட கல்வெட்டுகளில் ஊரும் பேரும்’ என்ற தலைப்பிலும், உதவிப் பேராசிரியா் வெ.இராமு, ‘இசைவழி தமிழ் கற்பிக்கும் முறைகள்’ என்ற தலைப்பிலும், ஆசிரியா் சை.அ.சையத் அஜ்மல் தஹசீன், ‘செம்மொழி தமிழும் செயற்கை நுண்ணறிவும்’ என்ற தலைப்பிலும், விரிவுரையாளா் ம.மோகனாம்பாள், ‘தமிழ் இலக்கியத்தில் வாழ்வியல்’ என்ற தலைப்பிலும் பேசினா். கல்லூரி தமிழ்த் துறைத் தலைவா் மு.கலைமாமணி நன்றி கூறினாா்.