முத்துமாரியம்மன் கோயில் திருவிழா

வாணியம்பாடி காவலர் குடியிருப்புப் பகுதியில் உள்ள முத்துமாரியம்மன் கோயில் திருவிழா செவ்வாய், புதன் ஆகிய இரு நாள்கள் நடைபெற்றது.
வாணியம்பாடி அரசினர் தோட்டத்தில் உள்ள காவலர் குடியிருப்புப் பகுதியில் அமைந்துள்ள முத்து மாரியம்மன் கோயிலின் 42-ஆம் ஆண்டு திருவிழாவையொட்டி, செவ்வாய்க்கிழமை காலை 7 மணிக்கு அம்மனுக்கு அபிஷேக ஆராதனைகள் நடைபெற்றன. 
பிற்பகல் 1 மணியளவில் கூழ் வார்த்தல் நடைபெற்றது.
இதைத் தொடர்ந்து, புதன்கிழமை காலை சென்னாம்பேட்டை பாலாற்றங்கரையில் அம்மன் கரகம் அலங்கரிக்கப்பட்டு, பொன்னியம்மன் கோயில் மற்றும் நகரின் முக்கிய வீதிகள் வழியாகச் சென்று கோயிலை அடைந்தது. பிற்பகல் 12 மணியளவில் தீ மிதி விழா, அன்னதானம் ஆகியவை நடைபெற்றன. 
விழாவில், டி.எஸ்.பி. முரளி, காவல் ஆய்வாளர்கள் ராமசந்திரன், சுரேஷ், சாந்தலிங்கம் மற்றும் பொதுமக்கள் கலந்து கொண்டனர்.