பைக் மீது ஆட்டோ மோதி விபத்து: ஆம்புலன்ஸ் வராததால் பொதுமக்கள் மறியல்

ஜோலார்பேட்டை அருகே வியாழக்கிழமை பைக் மீது ஆட்டோ மோதிய விபத்தில் 2 குழந்தைகள் உள்பட 5 பேர் பலத்த காயமடைந்தனர். அவர்கள் மருத்துவமனைக்கு அழைத்துச் செல்ல ஆம்புலன்ஸ் வராததால் பொதுமக்கள் சாலை மறியலில் ஈடுபட்டனர். 
நாட்டறம்பள்ளியை அடுத்த பச்சூர் பகுதியைச் சேர்ந்தவர் அனுமுத்தன் (40). தொழிலாளியான இவர் வியாழக்கிழமை தனது பைக்கில் மனைவி பபிதா மற்றும் 2 குழந்தைகளுடன் திருப்பத்தூர் நோக்கி சென்று கொண்டிருந்தார். 
ஜோலார்பேட்டையை அடுத்த தாமலேரிமுத்தூர் ரயில்வே கேட் அருகே வந்தபோது, நாட்டறம்பள்ளி நோக்கி வந்த சரக்கு ஆட்டோ பைக் மீது மோதியது. 
இதில், அனுமுத்தன், அவரது மனைவி, 2 குழந்தைகள், ஆட்டோ ஓட்டுநர் என 5 பேர் பலத்த காயமடைந்தனர். இதையடுத்து அப்பகுதி மக்கள் 108 ஆம்புலன்ஸுக்கு தகவல் தெரிவித்தனர். ஆனால், ஒரு மணி நேரம் ஆகியும் ஆம்புலன்ஸ் வாகனம் வராததால், ஆத்தரமடைந்த அப்பகுதி மக்கள் நாட்டறம்பள்ளி-திருப்பத்தூர் சாலையில் மறியலில் ஈடுபட்டனர்.
தகவலறிந்த ஜோலார்பேட்டை போலீஸார் அங்கு வந்து மறியலில் ஈடுபட்டவர்களிடம் பேச்சுவார்த்தை நடத்தினர். மேலும், காயமடைந்த 5 பேரையும் தனியார் வாகனத்தில் ஏற்றி, திருப்பத்தூர் அரசு மருத்துவமனைக்கு அனுப்பி  வைத்தனர்.
இதில், அனுமுத்தன், பபிதா, 2 குழந்தைகள் மேல் சிகிச்சைக்காக தருமபுரி அரசு மருத்துவமனைக்கு அனுப்பி வைக்கப்பட்டனர். 
இதுகுறித்து போலீஸார் வழக்குப் பதிவு செய்து, விபத்து ஏற்படுத்திய ஆட்டோ ஓட்டுநரான தருமபுரி மாவட்டத்தைச் சேர்ந்த ஷபீரிடம் (45)  விசாரணை நடத்தி வருகின்றனர்.