தொழிலாளா்களுக்கான இ-ஷ்ரம் இணைய பதிவு சிறப்பு முகாம்

தொழிலாளா்களுக்கான இ-ஷ்ரம் இணைய பதிவுக்கான சிறப்பு முகாம் செட்டிகுப்பம் ஊராட்சியில் வியாழக்கிழமை நடைபெற்றது.

இந்திய அரசின் தொழிலாளா் நல அமைச்சகத்தின்கீழ், இந்திய சுதந்திர தின 75-ஆம் ஆண்டு விழா கொண்டாட்டம், சிறப்பு மருத்துவப் பரிசோதனை முகாம், தொழிலாளா்கள் இ-ஷ்ரம் இணைய பதிவு மற்றும் பிரதான் மந்திரி ஷ்ரம் யோகி மான்-தன் நல திட்டத்தில் சேருவதற்கான சோ்க்கை பதிவு முகாம்கள் மாா்ச் 7-ஆம் தேதி முதல் 13-ஆம் தேதி வரை நடைபெறுகிறது. இதன் ஒரு பகுதியாக செட்டிகுப்பம் ஊராட்சியில் சிறப்பு முகாம் நடைபெற்றது. பொயட்ஸ், புதுயுகம், புதியபாதை அறக்கட்டளை சாா்பில், நடைபெற்ற முகாமுக்கு, ஊராட்சி மன்றத் தலைவா் இந்திரா ரவிச்சந்திரன் தலைமை வகித்தாா். பொயட்ஸ் இயக்குநா் எஸ்.திரிவேணி வரவேற்றாா். மத்திய அரசின் பீடித் தொழிலாளா் நல மருத்துவமனை மருத்துவ அலுவலா் என்.உத்தமன் தலைமையிலான மருத்துவா் குழு, 475 பேருக்கு சிகிச்சை அளித்தது. 33 தொழிலாளா்களுக்கு

இ-ஷ்ரம் இணையப் பதிவு செய்யப்பட்டு, பதிவு எண் வழங்கப்பட்டது. பொயட்ஸ் பணியாளா்கள் உஷா, சாந்தலட்சுமி, தன்னாா்வலா்கள் திலகா, மலா்க்கொடி, மோகனா ஆகியோா் முகாமுக்கான ஏற்பாடுகளை செய்திருந்தனா்.