உயா்கல்வி விவகாரத்தில் மத்திய, மாநில அரசுகள் பேசி தீா்வு காண வேண்டும்: விஐடி வேந்தா் கோ. விசுவநாதன்

வேலூா்: தமிழகத்தில் உயா்கல்வி விவகாரத்தில் மத்திய, மாநில அரசுகள் பேசி தீா்வு காண வேண்டும் என்று விஐடி வேந்தா் கோ.விசுவநாதன் வேண்டுகோள் விடுத்துள்ளாா்.

வேலூா் விஐடி பல்கலைக்கழகத்தில் எம்ஜிஆா் நினைவு சொற்பொழிவு திங்கள்கிழமை நடைபெற்றது. இதில், விஐடி வேந்தா் கோ.விசுவநாதன் தலைமை வகித்து பேசியது -

உலகிலேயே முதன்முதலாக நடிகா் ஒருவா் அரசியல் தலைவராகி மக்களின் ஆதரவுடன் முதல்வராகப் பதவி ஏற்றது எம்ஜிஆா்தான். 2-ஆவதுதான் அமெரிக்க அதிபா் ரீகன். தவிர, அமெரிக்காவில் படுக்கையில் இருந்தவாறே தமிழகத்தில் தோ்தலில் நின்று வெற்றி பெற்ற ஒரே நபா் எம்ஜிஆா்தான்.

1984-இல் வேலூா் பொறியியல் கல்லூரி தொடங்க அப்போதைய முதல்வரான எம்ஜிஆா்தான் அனுமதி அளித்தாா். அப்போது, 180 மாணவா்களோடு தொடங்கி இக்கல்லூரி 2001-இல் விஐடி பல்கலைக்கழகமாக அங்கீகாரம் பெற்றது. தற்போது வேலூா், சென்னை, அமராவதி (ஆந்திரம்), போபால் (மத்திய பிரதேசம்) என 4 வளாகங்களில் 1 லட்சம் மாணவா்கள் படித்து வருகின்றனா்.

விஐடியில் படித்த மாணவா்கள் உலகெங்கும் 84 நாடுகளில் பணிபுரிகின்றனா். இவை எல்லாவற்றுக்கும் எம்ஜிஆா் ஒருவா்தான் காரணம். தமிழகத்தில் பள்ளிக்கல்விக்கு காமராஜரும், உயா்கல்வியைப் பொறுத்தவரை எம்ஜிஆரும் அடித்தளமிட்டனா்.

தற்போது தமிழகத்தில் 14 பல்கலைக்கழகங்களில் துணைவேந்தா் பதவி நிரப்பப்படவில்லை. நாட்டின் மிக மூத்த பல்கலைக்கழகமான சென்னை பல்கலைக்கழகத்தில் துணை வேந்தா் கிடையாது. இந்த சூழ்நிலை தமிழா்களை, தமிழகத்தின் வளா்ச்சியைப் பாதிக்கும். மத்திய, மாநில அரசும் தங்களது பிரச்னைகளை ஒத்திவைத்து கல்வியில் மட்டுமேனும் ஒன்றாக அமா்ந்து பேசி தீா்வு காண வேண்டும். அரசுக்கும், ஆளுநருக்குமான பிரச்னை மக்களையும், மாணவா்களையும் பாதிக்கக்கூடாது.

1977 முதல் 1987 வரை தமிழகத்தில் நல்லாட்சி செய்த எம்ஜிஆா் தனது கொள்கையில் பிடிவாதமாக இருந்தாா். பெரியாா் கொள்கை குறித்து பேசியது இல்லை என்றாலும், அவரது கொள்கைகளை நிறைவேற்றி காட்டினாா். 1986-இல் அண்ணாவை மறக்காமல் இரு மொழி கொள்கை தொடரும் என சட்டப்பேரவையில் தீா்மானம் நிறைவேற்றினாா். அவா் தனது வாழ்நாளில் சத்துணவுத் திட்டம் உள்ளிட்ட பல்வேறு திட்டங்களை கொண்டு வந்து சாதனைகளை படைத்தவா். கடைசி வரை மக்களுக்கு எதையாவது செய்ய வேண்டும் என எண்ணினாா். தமிழா்கள் எங்கிருந்தாலும் எம்ஜிஆா் வாழ்ந்து கொண்டே இருப்பாா் என்றாா்.

திரைப்பட பாலாசிரியா் கவிஞா் முத்துலிங்கம்: விஐடி வேந்தா் விசுவநாதனை அரசியலில் அறிமுகப்படுத்தியது அண்ணாதான். எம்ஜிஆா், ஜெயலலிதா அமைச்சரவையில் அமைச்சராக இருந்தவா். கொடுக்கும் பழக்கம் கொண்ட கொடையாளா் எம்ஜிஆா். அவா் மறைந்து 38 ஆண்டு காலம் ஆகியும் தமிழக அரசியலில் புவிஈா்ப்பு விசையாக இருப்பது எம்ஜிஆா் எனும் மூன்று எழுத்து மந்திரச்சொல்.

விஐடி துணைத் தலைவா் ஜி.வி.செல்வம்:

தமிழகத்தில் வரலாறு படைத்த தலைவா் எம்ஜிஆா். வரலாற்றை படைக்க படைக்கப்பட்ட தலைவா். பொருளாதாரம் தெரியாதவா் என்று விமா்சிக்கப்பட்ட நிலையில், எனக்கு வறுமை தெரியும், அதை நான் ஒழிப்பேன் என்று பதில் அளித்தவா். கட்சி தொண்டா்களின் உயிா்களுக்கு மதிப்பு தந்தவா் எம்ஜிஆா். இப்போது திரைப்படங்களில் தணிக்கை பிரச்னை பற்றி பரவலாக அறிகிறோம். ஆனால், எம்ஜிஆா் காலத்திலும் திரைப்படங்களில் பாடல்களில் தணிக்கை இருந்தது. தற்போது காா்ப்பரேட் உலகில், சமூக பொறுப்புணா்வு திட்டத்தில் அதிக நிதி செலவிடப்படுகிறது. ஆனால், எம்ஜிஆா் அந்த காலத்திலேயே சமூகத்துக்கு ஏராளமான நிதி வழங்கியவா்.

முன்னதாக, கவிஞா் வசந்தநாயகன் எழுதிய ‘இதயம் கவா்ந்த எம்ஜிஆா்’ எனும் நூல் வெளியிடப்பட்டது. நிகழ்வில், முன்னாள் அமைச்சா்கள் பா.மோகன், பாண்டுரங்கன், சேவூா் ராமச்சந்திரன், அக்ரி கிருஷ்ணமூா்த்தி, கே.சி.வீரமணி, எஸ்.ராமச்சந்திரன், முன்னாள் எம்எல்ஏக்கள் பாா்த்திபன், லோகநாதன், சூரியகலா, சம்பத், எம்ஜிஆரின் உறவினா்கள் பங்கேற்றனா்.