ஊர்க்காவல் படையை சேர்ந்தவர் மீது புகார்

போலீஸ் என்று கூறி பொதுமக்களை மிரட்டி வருவதாக ஊர்க்காவல் படையைச் சேர்ந்தவர் மீது மாநகரக் காவல் ஆணையர் அலுவலகத்தில் திங்கள்கிழமை புகார் அளிக்கப்பட்டது.

கோவை, காந்திபுரம், சாஸ்திரி நகரைச் சேர்ந்த பொதுமக்கள் சார்பில் கோவை மாநகரக் காவல் ஆணையர் ஏ.கே.விஸ்வநாதனிடம் அளிக்கப்பட்ட மனுவில் கூறியிருப்பதாவது:

எங்கள் பகுதியைச் சேர்ந்த முத்துசாமி (எ) மனோஜ் ஊர்க்காவல் படையில் பணியாற்றி வருகிறார். இவரது சகோதரர் கதிரவன் (எ) ஸ்டீபன் திமுகவைச் சேர்ந்தவர். இந்நிலையில், ஊர்க்காவல் படை வீரராக உள்ள முத்துசாமி, தன்னை போலீஸ் என்று கூறி எங்கள் பகுதியில் வசிக்கும் பொதுமக்களை மிரட்டி வருகிறார்.

மேலும், எங்கள் பகுதியில் வசிக்கும் பொதுமக்களை திமுகவில் சேருமாறும், வேறு எந்த கட்சியிலும் சேரக்கூடாது என்றும், மீறினால் போலீஸில் பொய்ப் புகார் தெரிவித்து வழக்குகளில் சிக்க வைத்துவிடுவேன் என்றும் மிரட்டுகிறார்.

இவ்வாறு முத்துசாமி தன் சுயலாபத்துக்காக எங்களது தனிமனித சுதந்திரத்தில் தலையிடுவது மட்டுமின்றி, சொந்த விருப்பு, வெறுப்புகளை வைத்து அதிகார துஷ்பிரயோகம் செய்கிறார். எனவே, அவர் மீது உரிய நடவடிக்கை எடுக்க வேண்டும் என்று தெரிவிக்கப்பட்டுள்ளது.