அரசு மருத்துவமனை வளாகத்தில்  சாலைகளைச் சீரமைக்க நடவடிக்கை: ஆட்சியர் அர்ச்சனா பட்நாயக் உத்தரவு

கோவை அரசு மருத்துவக் கல்லூரி மருத்துவமனை வளாகத்தில் உள்ள சாலைகளைச் சீரமைக்க பொதுப்பணித் துறைக்கு மாவட்ட ஆட்சியர் அர்ச்சனா பட்நாயக் உத்தரவிட்டுள்ளார்.

 கோவை அரசு மருத்துவக் கல்லூரி மருத்துவமனையின் நோயாளிகள் பதிவு அறை, புற்றுநோய் சிகிச்சைப் பிரிவு, தீவிர சிகிச்சைப் பிரிவு, பச்சிளங் குழந்தைகள் பிரிவு, பொதுமருத்துவப் பிரிவு உள்ளிட்ட பகுதிகளில் மாவட்ட ஆட்சியர் அர்ச்சனா பட்நாயக் திங்கள்கிழமை ஆய்வு மேற்கொண்டார்.

 இதையடுத்து அவர் கூறியதாவது:

 மருத்துவமனைப் பகுதியில் சுகாதாரத்தை மேம்படுத்தவும், மருத்துவமனை வளாகச் சாலைகளை சீரமைத்து மழைக் காலங்களில் மருத்துவமனை வளாகத்தில் தண்ணீர் தேங்காதவாறு சாலைகள் அமைக்கவும் பொதுப்பணித் துறையினருக்கு உத்தரவிடப்பட்டுள்ளது.

 அதேபோல, தண்ணீர் கசியும் இடங்களைச் சீரமைக்குமாறும், சாக்கடைகளில் தடையின்றி கழிவுநீர் செல்லுமாறு சரி செய்யவும் உத்தரவிடப்பட்டுள்ளது.

 மருத்துவமனையின் தரம், சுற்றுப்புறச் சுகாதாரத்தை தனியார் மருத்துவமனைகளுக்கு இணையாக மேம்படுத்தவும், அனைத்துப் பிரிவுகளிலும் பெயர்ப் பலகைகள் தெளிவாகவும், நோயளிகள் எளிதில் அறிந்து கொள்ளும் வகையிலும் வைக்கவும், வழிகாட்டி அலுவலர்களை நியமித்து நோயாளிகளுக்கு உரிய விவரங்களை தெளிவாக தெரிவிக்க வேண்டும் எனவும் அறிவுறுத்தப்பட்டுள்ளது என்றார்.

 இந்த ஆய்வின்போது, அரசு மருத்துவக் கல்லூரி டீன் டாக்டர் எட்வின்ஜோ, பொதுப்பணித் துறை செயற்பொறியாளர் எம்.பழனிசாமி, மருத்துவமனைக் கண்காணிப்பாளர் அசோகன் உள்ளிட்டோர் கலந்துகொண்டனர்.