அறிவிக்கப்படாத மின்வெட்டு: பொள்ளாச்சி மின்வாரிய அலுவலகம் முற்றுகை

பொள்ளாச்சி அமைதி நகர் பகுதியில் அறிவிக்கப்படாத மின்வெட்டைக் கண்டித்து பொதுமக்கள் மின்வாரிய அலுவலகத்தை முற்றுகையிட்டு வெள்ளிக்கிழமை போராட்டம் நடத்தினர்.

பொள்ளாச்சி, 35-ஆவது வார்டு, அமைதிநகர் பகுதியில் கடந்த சில வாரங்களாக தொடர்ந்து பலமுறை முன்னறிவிப்பு இன்றி மின்விநியோகம் நிறுத்தப்படுவதாக அப்பகுதி மக்கள் புகார் தெரிவித்து வந்தனர்.

இந்நிலையில், அமைதி நகர் பகுதி மக்கள் உடுமலை சாலையில் உள்ள மின்வாரிய அலுவலகத்தை வெள்ளிக்கிழமை முற்றுகையிட்டனர். அவர்களிடம் மின்வாரிய அதிகாரிகள் பேச்சுவார்த்தை நடத்தி, மின்தடை ஏற்படாமல் இருக்க நடவடிக்கை எடுப்பதாக உறுதியளித்ததையடுத்து போராட்டம் கைவிடப்பட்டது.

இதேபோல, பொள்ளாச்சி அங்கலக்குறிச்சி பகுதியில் கடந்த சில நாள்களாக முன்னறிவிப்பு இல்லாமல் தொடர்ந்து பலமுறை மின்நிறுத்தம் செய்யபடுவதாகக் கூறி அப்பகுதி மக்கள் பொள்ளாச்சி - ஆழியாறு சாலையில் மறியலில் ஈடுபட்டனர்.

அவர்களிடம் அதிகாரிகள் பேச்சுவார்த்தை நடத்தியதைடுத்து போராட்டம் கைவிடப்பட்டது.