காய்ச்சல் அறிகுறி: சுகாதாரத் துறையினர் எச்சரிக்கை

காலநிலை மாற்றத்தால் காய்ச்சல் பரவக்கூடிய அறிகுறி இருப்பதாக சுகாதாரத் துறையினர் எச்சரிக்கை விடுத்துள்ளனர்.

இதுகுறித்து, வால்பாறை அரசு ஆரம்ப சுகாதார நிலைய வட்டார மருத்துவ அலுவலர் பிரவீன் கூறியதாவது:

வால்பாறை வட்டாரத்தில் சமீபகாலமாக காலநிலை அடிக்கடி மாறி வருகிறது. மழை, வெயில் என மாறி, மாறி வரும் காலநிலை மாற்றத்தால் குடிநீரின் தன்மையும் மாற வாய்ப்புள்ளது. மேலும், இங்கு வசிப்பவர்கள் பல்வேறு ஊர்களுக்குச் சென்று திரும்புபோது, காய்ச்சல் ஏற்பட்டு, அந்தக் காய்ச்சல் இங்கு வசிப்பவர்களுக்கும் பரவிவிடுகிறது. எனவே, பொதுமக்கள் அனைவரும் குடிநீரைக் காய்ச்சிக் குடிக்கவேண்டும்.

குடியிருப்புகள் அமைந்துள்ள பகுதிகளைச் சுத்தமாக வைத்துக்கொள்வதால், கொசு மூலமாகப் பரவும் காய்ச்சலைத் தடுக்கலாம்.

இதேபோல, வால்பாறை பகுதியில் உள்ள அனைத்து உணவகங்கள், பேக்கரிகளில் பொதுமக்களுக்கு கட்டாயம் சுடு தண்ணீர், சுகாதாரமான, தரமான உணவுப் பண்டங்களை வழங்க அறிவுறுத்தப்பட்டுள்ளது. மேலும், அதுகுறித்து விரைவில் கடைகளில் சோதனை மேற்கொள்ளப்படவுள்ளது என்றார்.