கிணத்துக்கடவு அருகே சாலை மறியல்

கிணத்துக்கடவை அடுத்த கொண்டம்பட்டியில் இலவச வீட்டுமனைப் பட்டா கேட்டு, பொள்ளாச்சி-கோவை சாலையில் சனிக்கிழமை மறியல் போராட்டம் நடைபெற்றது.

கொண்டம்பட்டியில் வசிக்கும் 50-க்கும் அதிகமானோர் இலவச வீட்டுமனைப் பட்டா கேட்டு கிணத்துக்கடவு வட்டாட்சியர் அலுவலகத்தில் விண்ணப்பித்திருந்ததாகத் தெரிகிறது. ஆனால், கடந்த ஓராண்டுக்கும் மேல் ஆகியும் வீட்டுமனைப் பட்டாக்கள் வழங்கப்படவில்லை. இதனால், ஆத்திரமடைந்த அப்பகுதி மக்கள் பொள்ளாச்சி-கோவை சாலையில் கிணத்துக்கடவில் சனிக்கிழமை மறியலில் ஈடுபட்டனர்.

கிணத்துக்கடவு போலீஸாரும், வருவாய்த்துறை அதிகாரிகளும் மறியலில் ஈடுபட்டவர்களிடம் பேச்சுவார்த்தை நடத்தி, பட்டா வழங்க நடவடிக்கை எடுப்பதாக உறுதியளித்தனர். இதையடுத்து மறியல் கைவிடப்பட்டது.