புரட்டாசி சனிக்கிழமை: கோயில்களில் சிறப்பு வழிபாடு

புரட்டாசி மாத இரண்டாம் சனிக்கிழமையையொட்டி, பெரியநாயக்கன்பாளையத்தில் உள்ள பல்வேறு கோயில்களில் சிறப்பு வழிபாடுகள் நடைபெற்றன.

பிரசித்தி பெற்ற பாலமலை ரங்கநாதர் திருக்கோயிலில் யாக வேள்விகள் நடத்தப்பட்டு பெருமாள் வெண்பட்டு உடுத்தி சேவை சாதித்தார். திருமலைநாயக்கன்பாளையத்தில் உள்ள ஸ்ரீ வரதராஜ பெருமாள் கோயிலில் காலை நடை திறக்கப்பட்டு அபிஷேக பூஜை நடத்தப்பட்டது. பின்னர் பெருமாள் கருடவாகனத்தில் எழுந்தருளி பக்தர்களுக்கு அருள்பாலித்தார். நாயக்கன்பாளையம், இடிகரையில்  உள்ள பள்ளி கொண்ட ரங்கநாதர் கோயிலில் நாம சங்கீர்த்தன பஜனையுடன் சிறப்பு வழிபாடுகள் நடைபெற்றன.

 பெரியநாயக்கன்பாளையம் கரிவரதராஜ பெருமாள் கோயில், பழைய புதூர் ஆதிமூர்த்தி பெருமாள் கோயில், நாயக்கனூர் நரசிங்கப் பெருமாள் கோயில் உள்ளிட்ட பல கோயில்கள் சிறப்பு வழிபாடுகள் நடைபெற்றன.