நாளை வேலை நிறுத்தப் போராட்டம்: சாலைப் போக்குவரத்து தொழிலாளர் சங்கம் அழைப்பு

ஆகஸ்ட் 7 ஆம் தேதி நடைபெறவுள்ள மோட்டார் தொழிலாளர்களின் நாடு தழுவிய வேலை நிறுத்தம், மறியல்  போராட்டத்தில் பங்கேற்க கோவை மாவட்ட சாலைப் போக்குவரத்துத் தொழிலாளர் சங்கம் (சிஐடியூ) அழைப்பு விடுத்துள்ளது. 
இதுதொடர்பாக சங்கத்தின் பொதுச் செயலர் ஏ.எம்.ரபீக் தெரிவித்துள்ளதாவது:
மோட்டார் வாகன சட்டத் திருத்தத்தை திரும்பப் பெறக் கோரியும், பெட்ரோல் மற்றும் டீசல் விலை உயர்வைக் கட்டுப்படுத்தக் கோரியும், டோல்கேட் வசூலைக் கைவிடக் கோரியும், காப்பீட்டின் பெயரால் கூடுதல் தொகை வசூலிக்கப்படுவதை நிறுத்தக் கோரியும் மத்திய அரசை வலியுறுத்தி ஆகஸ்ட் 7ஆம் தேதி நாடு தழுவிய வேலை நிறுத்தம் நடைபெற உள்ளது. 
இதில், கோவை மாவட்ட சாலைப் போக்குவரத்துத் தொழிலாளர் சங்கத்தினர்  பங்கேற்பதுடன், அன்று காலை 10 மணிக்கு கோவை, டவுன்ஹால் பகுதியில் நடைபெறவுள்ள மறியல் போராட்டத்திலும் அனைவரும் பங்கேற்க வேண்டும்.
இப்போராட்டத்தின் காரணமாக 7ஆம் தேதி அனைத்து விதமான டெம்போ, டாக்ஸி, வேன், ஆட்டோ, லாரி உள்ளிட்ட அனைத்து சாலைப் போக்குவரத்து வாகனங்களும் இயங்காது.  
எனவே, சாலைப் போக்குவரத்துத் தொழிலாளர்களின் வாழ்வாதாரப் பிரச்னைகளை முன்வைத்து நடத்தப்படும் இந்தப் போராட்டத்துக்கு பொது மக்களும் முழு ஆதரவளிக்க வேண்டும் என தெரிவிக்கப்பட்டுள்ளது.