ராமகிருஷ்ணா பொறியியல் கல்லூரியில் பட்டமளிப்பு விழா

துடியலூரையடுத்த வட்டமலைப்பாளையத்தில் உள்ள ராமகிருஷ்ணா பொறியியல் கல்லூரியின் 20ஆவது பட்டமளிப்பு விழா வெள்ளி, சனிக்கிழமைகளில் நடைபெற்றது. 
கல்லூரி கலையரங்கில் நடைபெற்ற இவ்விழாவில் கல்லூரி முதல்வர் என்.ஆர்.அலமேலு வரவேற்றார். வெள்ளிக்கிழமை நடைபெற்ற முதல்நாள் விழாவுக்கு எஸ்.என்.ஆர்.அறக்கட்டளை நிர்வாக அறங்காவலர் ஆர்.விஜயகுமார் முன்னிலை வகித்தார். 
விழாவில் மும்பை மற்றும் கோவை மண்டல லார்சன் டியூப்ரோ நிறுவனத்தின் ஏவுகணைகள் மற்றும் விண்வெளிப் பிரிவு இயக்கத்தின் தலைவர் பி.ஹெச்.லட்மேஷ் சிறப்பு விருந்தினராகப் பங்கேற்று 514 பேருக்கு பட்டங்களை வழங்கிப் பேசினார். 
சனிக்கிழமை நடைபெற்ற இரண்டாம் நாள் விழாவுக்கு எஸ்.என்.ஆர்.அறக்கட்டளை துணை நிர்வாக அறங்காவலர் டி.லட்சுமி நாராயணா முன்னிலை வகித்தார்.
இதில், கிழக்காசிய ஜி.இ.ஹெல்த் கேர் நிறுவன விற்பனைப் பிரிவுத் தலைமை அதிகாரி ராகவேந்திரா சிறப்பு விருந்தினராகப் பங்கேற்று 523 பேருக்கு பட்டங்களை வழங்கிப் பேசினார். பல்வேறு துறைகளில் முதல் மதிப்பெண் பெற்ற 10 மாணவ, மாணவிகளுக்கு தங்கப்பதக்கங்கள் வழங்கப்பட்டன. 
விழாவில் கல்விப் பிரிவு இயக்குநர் எபிநேசர் ஜெயகுமார், எஸ்.என்.ஆர்.அறக்கட்டளை அறங்காவலர்கள், நிறுவனத்தின் தலைமைச் செயல் அதிகாரி சி.வி.ராமகிருஷ்ணா உள்ளிட்ட பலர் கலந்துகொண்டனர்.