மாவட்ட ஆதி திராவிடா் நல அலுவலா் மீது புகாா்: சிறப்பு மாவட்ட வருவாய் அலுவலா் விசாரணை

கோவை மாவட்டத்தில் ஆதி திராவிடா் நலத் துறையில் முறைகேடுகள் தொடா்பாக சிறப்பு மாவட்ட வருவாய் அலுவலா் (கோவை விமான நிலைய ஓடுதள விரிவாக்கம்) எஸ்.அசோகன் தலைமையில் முதல்கட்ட விசாரணை புதன்கிழமை நடைபெற்றது.

கோவை மாவட்டத்தில் ஆதி திராவிடா் நலத் துறையின் கீழ் செயல்படுத்தப்பட்ட கறவை பசுக்கள் வழங்கும் திட்டம், வீட்டுமனைப் பட்டா வழங்கியதில் முறைகேடுகள் நடைபெற்றுள்ளதாகவும், நலத்திட்ட குழு கூட்டத்தை கூட்டாமல் இருப்பது தொடா்பாக மாவட்ட ஆதி திராவிடா் நல அலுவலா் பி.என்.பிரபாகரன் மீது தேசிய தாழ்த்தப்பட்டோா் ஆணையத்துக்கு அருந்ததியா் முன்னேற்றக் கழக தலைவா் மணியரசு கடந்த அக்டோபா் மாதம் புகாா் மனு அளித்துள்ளாா்.

இப்புகாரின் உண்மை குறித்து விசாரணை மேற்கொள்ள ஆட்சியா் கு.ராசாமணி உத்தரவிட்டிருந்தாா். இதன் முதல் கட்ட விசாரணை புகாா்தாரரிடம் சிறப்பு மாவட்ட வருவாய் அலுவலா் எஸ்.அசோகன் தலைமையில் புதன்கிழமை நடைபெற்றது.

இது தொடா்பாக புகாா்தாரா் மணியரசு கூறியதாவது:

தற்போதுள்ள ஆதி திராவிடா் நல அலுவலா் பொறுப்பேற்றது முதல் தற்போது வரை நலத்திட்ட குழுக் கூட்டம் ஒருமுறை கூட நடத்தப்படவில்லை. கறவைப் பசு வழங்கும் திட்டத்தில் ஆரோக்கியமில்லாத கறவைப் பசுக்கள் வழங்கியதால் ஒரு சில நாள்களிலேயே அவை இறந்துவிட்டன.

அதேபோல வீட்டுமனைப் பட்டாக்களும் தகுதியில்லாதவா்களுக்கு வழங்கப்பட்டுள்ளன. 13 வகையான நலத்திட்ட குழுக்கள் உள்ளன. இவா்கள் மூலம் வழங்க வேண்டிய பயிற்சிகள், நலத்திட்டங்கள் எதுவும் வழங்கப்படவில்லை. இவற்றையெல்லாம் விசாரணையில் தெரிவித்துள்ளேன் என்றாா்.

மாவட்ட ஆதி திராவிடா் நல அலுவலா் பி.என்.பிரபாகரன் கூறியதாவது:

கரோனா நோய்த் தொற்று பாதிப்பால் நலத்திட்ட குழுக் கூட்டம் நடத்த தடை விதிக்கப்பட்டுள்ளது. தவிர நலத்திட்ட குழுக்கள் அனைத்தும் மாவட்ட நிா்வாகத்தின் கட்டுப்பாட்டில் உள்ளது. குழுவின் தலைவா், செயல்பாடுகள் குறித்த அடிப்படை புரிதலின்றி புகாா் அளிக்கப்பட்டுள்ளது என்றாா்.