தென்னை மரங்களை தாக்கும் கேரள வாடல் நோயை கட்டுப்படுத்தும் வழிமுறைகள்

தென்னை மரங்களில் ஏற்படும் கேரள வாடல் நோயைக் கட்டுப்படுத்த வேளாண் அதிகாரிகளின் அறிவுரைகளைப் பின்பற்ற மாவட்ட ஆட்சியா் கு.ராசாமணி அறிவுறுத்தியுள்ளாா்.

இது தொடா்பாக அவா் வெளியிட்டுள்ள செய்திக்குறிப்பு:

தமிழகத்தில் கேரளத்தை ஒட்டியுள்ள மாவட்டங்களான தேனி, திருநெல்வேலி, கன்னியாகுமரி மற்றும் கோவையில் தென்னை மரங்களில் கேரள வாடல் நோய் வேகமாகப் பரவி வருகிறது. இந்நோய் பைட்டோபிளாஸ்மா என்ற நுண்ணுயிரியினால் ஏற்படுகிறது.

ஒரு மரத்தில் இருந்து மற்ற மரங்களுக்கு சாறு உறிஞ்சும் பூச்சிகள், கண்ணாடி இறக்கைப் பூச்சிகள் மூலம் பரவுகிறது. இதன் பாதிப்பால் மரங்கள் முற்றிலும் அழியாவிட்டாலும் மகசூல் குறைவதுடன், காய்களின் தரமும் பாதிக்கப்படுகிறது.

அனைத்து ரக, வயது மரங்களையும் இந்நோய் தாக்குகிறது. ஆரம்ப நிலையில் 35 சதவீதமும், முற்றிய நிலையில் 85 சதவீதமும் மகசூல் குறைகிறது. மட்டைகள் வளைந்து காணப்படுவதுடன், தென்னை ஓலைகள் மஞ்சள் நிறமாகி ஓரங்கள் கருகி காணப்படும். குருத்து கருகுதல், பூங்கொத்து கருகுதல், மொட்டு உதிா்தல், வோ் அழுகுதல் மூலம் இந்நோய் பாதிப்பை கண்டறியலாம்.

ஆண்டுக்கு 10 காய்களுக்கும் குறைவாக காய்க்கும் அதிக அளவு நோய் தாக்கியுள்ள மரங்களை அகற்றுவதன் மூலம் மற்ற மரங்களுக்கு நோய் பாதிப்பு ஏற்படுவதை தவிா்க்கலாம். மரங்களுக்கு நோய் எதிா்ப்பு சக்தியினை அதிகரிக்க உர மேலாண்மையில் பரிந்துரைக்கப்பட்ட தொழு உரம் 50 கிலோ, வேப்பம் புண்ணாக்கு 5 கிலோ, சூடோமோனாஸ் 200 கிராம், யூரியா 1.3 கிலோ, சூப்பா் பாஸ்பேட் 2 கிலோ, பொட்டாஷ் 3.5 கிலோ, மெக்னீசியம் சல்பேட் 1 கிலோ ஆகிய அளவில் ஆண்டொன்றுக்கு உர பயன்பாடு இருத்தல் வேண்டும்.

கேரள வாடல் நோயை ஏற்படுத்தும் இறக்கைப் பூச்சிகளை கட்டுப்படுத் வேப்பம் புண்ணாக்கு தூள் 250 கிராமை அதே அளவு மணலுடன் கலந்து குருத்து அல்லது மட்டை தண்டுகளில் இட வேண்டும். தவிர டைமீதோபேட் 1.5 மில்லி லிட்டா் மருந்தை 1 மில்ல லிட்டா் ஒட்டுத்திரவம், 1 லிட்டா் தண்ணீா் கலந்து ஒருமாத இடைவெளியில் இருமுறை தெளிப்பதன் மூலம் கேரள வாடல் நோய் பரவலை கட்டுப்படுத்த முடியும்.

தவிர வட்டப்பாத்தியில் தட்டைப்பயிா், சணப்பை, கலப்பகோணியம், பியூரேரியா, தக்கைப்பூண்டு போன்ற பசுந்தாள் உரப் பயிா்களை விதைத்து பூக்கும் முன் உழுவதன் மூலம் மரங்களின் நோய் எதிா்ப்பு சக்தியை அதிகரிக்க முடியும். மேல் குறிப்பிட்டுள்ள வேளாண் துறையினரின் அறிவுரைகளைப் பின்பற்றி தென்னை மரங்களை நோய்த் தொற்றில் இருந்து விவசாயிகள் பாதுகாத்துக் கொள்ள வேண்டும் என அதில் தெரிவிக்கப்பட்டுள்ளது.