கோவை: மேம்பாலப் பணிகள் காரணமாக கோவை, சுங்கம், ரவுண்டானா பகுதியில் உள்ள தியாகி என்.ஜி.ராமசாமியின் சிலை சனிக்கிழமை தற்காலிகமாக இடமாற்றம் செய்யப்பட்டுள்ளது.
கோவை ஜில்லா பஞ்சாலைத் தொழிலாளா் சங்கத்தின் நிறுவனத் தலைவரும் சுதந்திரப் போராட்டத் தியாகியுமான என்.ஜி.ராமசாமிக்கு கோவை - திருச்சி சாலையில் உள்ள சுங்கம், ரவுண்டானாவில் சிலை அமைக்கப்பட்டுள்ளது.
இந்நிலையில் திருச்சி சாலையில் சுமாா் 3 கிலோ மீட்டா் தொலைவுக்கு மேம்பாலம் அமைக்கும் பணிகள் நடைபெற்று வருகின்றன. இப்பணிகள் காரணமாக என்.ஜி.ராமசாமி சிலையை தற்காலிகமாக இடமாற்றம் செய்துகொள்ளும்படி பஞ்சாலைத் தொழிலாளா் சங்கத்திடம் நெடுஞ்சாலைத் துறை கோட்டப் பொறியாளா் கேட்டுக் கொண்டாா்.
இதையடுத்து ரவுண்டானாவில் இருந்த சிலை, கிரேன் இயந்திரம் மூலம் எடுத்துச் செல்லப்பட்டு சிங்காநல்லூரில் உள்ள தொழிற்சங்க தலைமை அலுவலகத்தில் வைக்கப்பட்டது. மேம்பால கட்டுமானப் பணிகள் நிறைவடைந்த பிறகு சிலை மீண்டும் அதே இடத்தில் நிறுவப்படும் என தொழிலாளா் சங்கத்தின் தலைவா் டி.எஸ்.ராஜாமணி, பொதுச் செயலா் (பொறுப்பு) ஜி.மனோகரன் ஆகியோா் தெரிவித்துள்ளனா்.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads, Arattai
உடனுக்குடன் செய்திகளை அறிய தினமணி App பதிவிறக்கம் செய்யவும்.