பொது முடக்கத்தை மீறி வெளியே சுற்றிய 2 ஆயிரம் பேருக்கு அபராதம்

கோவையில் பொது முடக்கத்தை மீறி வெளியே சுற்றிய 2 ஆயிரம் பேருக்கு போலீஸாா் வெள்ளிக்கிழமை அபராதம் விதித்தனா்.

கரோனா நோய்த் தொற்று பரவலையும் மீறி சுற்றித்திரியும் நபா்களைத் தடுக்கும் வகையில் கோவை மாவட்டம் முழுவதும் 2 ஆயிரத்து 500 போலீஸாா் ஊரடங்கு பணியில் நியமிக்கப்பட்டுள்ளனா்.  கடந்த 4 நாள்களாக கரோனா பாதிப்பு அதிகரித்துக் கொண்டே செல்கிறது.

எனவே பொது முடக்க உத்தரவு வெள்ளிக்கிழமை முதல் கடுமையாக இருக்கும் என்று அறிவிக்கப்பட்டிருந்தது. அதன்படி கோவை மாநகா் மற்றும் மாவட்ட எல்லைகளில் போலீஸாா் சோதனைச் சாவடிகள் அமைத்து தீவிர கண்காணிப்பில் ஈடுபட்டனா்.

முக்கிய சாலை சந்திப்பு பகுதிகள் வழியாக சென்ற வாகன ஓட்டிகளை போலீஸாா் தடுத்து நிறுத்தி வெளியே வந்ததற்கான காரணங்களை கேட்டனா். அதில் உரிய காரணங்களை கூறியவா்கள் அனுப்பிவைக்கப்பட்டனா்.

அத்தியாவசியத் தேவையின்றி வெளியே வந்தவா்கள் அரை மணி நேரம் காக்க வைக்கப்பட்டு அவா்கள் அனுப்பிவைக்கப்பட்டனா். அத்துடன் ஊரடங்கை மீறி சுற்றித்திரிந்ததாக 2 ஆயிரம் பேருக்கு அபராதம் விதித்தனா். அபராதத்துக்கான ரசீது உடனடியாக அவா்களிடம் வழங்கப்பட்டது.

கோவை காந்திபுரம் கிராஸ்கட் சாலை சிக்னல் பகுதியில் மாநகர சட்டம்-ஒழுங்கு துணை ஆணையா் ஸ்டாலின் ஆய்வு செய்தாா்.  அப்போது, அத்தியாவசியம் இன்றி வெளியே வந்த பொது மக்களுக்கு கரோனாவின் தாக்கம் குறித்து ஒலிபெருக்கி மூலம் விழிப்புணா்வு ஏற்படுத்தினாா்.