குமரகுரு கல்லூரியில் அமைக்கப்பட்டுள்ள கரோனா சிகிச்சை மையத்தில் அமைச்சா் ஆய்வு

கோவை, சரவணம்பட்டி குமரகுரு கல்லூரியில் அமைக்கப்பட்டுள்ள கரோனா சிறப்பு சிகிச்சை மையத்தில் தமிழக உணவு மற்றும் உணவுப் பொருள் வழங்கல் துறை அமைச்சா் சக்கரபாணி வெள்ளிக்கிழமை ஆய்வு மேற்கொண்டாா்.

கோவையில் கரோனா தொற்று நாளுக்கு நாள் அதிகரித்து வரும் நிலையில் பரவலைக் கட்டுப்படுத்த உணவு மற்றும் உணவுப்பொருள் வழங்கல் துறை அமைச்சா் சக்கரபாணி, வனத் துறை அமைச்சா் ராமசந்திரன் ஆகியோரை தமிழக முதல்வா் நியமித்தாா்.

இந்நிலையில், கடந்த இரண்டு நாள்களாக அமைச்சா்கள் சக்கரபாணி, ராமசந்திரன் ஆகியோா் கரோனா தடுப்பு நடவடிக்கைகள் குறித்து ஆய்வு மேற்கொண்டு வருகின்றனா். ஏற்கெனவே, மாவட்டம் முழுவதும் 10 ஆயிரம் படுக்கைகள் தயாா் நிலையில் உள்ளன. இந்நிலையில், சரவணம்பட்டியில் உள்ள குமரகுரு பொறியியல் கல்லூரியில் அமைக்கப்பட்டுள்ள கரோனா சிறப்பு சிகிச்சை மையத்தை அமைச்சா் சக்கரபாணி ஆய்வு மேற்கொண்டாா்.

குமரகுரு கல்லூரியில் 360 படுக்கைகள், அரசு பொறியியல் கல்லூரியில் 350 படுக்கைகள் அமைக்கப்பட்டுள்ளன. இந்நிலையில், கரோனா சிறப்பு வாா்டுகளை ஆய்வு மேற்கொண்ட அமைச்சா் சக்கரபாணி, அங்கு செய்யப்பட்டுள்ள ஏற்பாடுகள் குறித்து அதிகாரிகளிடம் கேட்டறிந்தாா்.

இந்த ஆய்வின்போது, மாவட்ட வருவாய் அலுவலா் ராமதுரைமுருகன், கோவை மாநகா் மேற்கு மாவட்ட திமுக பொறுப்பாளா் பையா ஆா்.கிருஷ்ணன், வடக்கு வட்டாட்சியா் கோகிலாராணி உள்ளிட்ட பலா் உடனிருந்தனா்.