அரசு நிலம் ஆக்கிரமிப்பு: எம்.பி. மறியல்

கோவை வரதராஜபுரத்தில் அரசு நிலத்தை, தனியாா் நிறுவனம் ஆக்கிரமிப்பு செய்துள்ளதாக கோவை மக்களவை உறுப்பினா் பி.ஆா்.நடராஜன் மக்களுடன் இணைந்து வியாழக்கிழமை மறியலில் ஈடுபட்டாா்.

கோவை வரதராஜபுரம் தனியாா் வணிக வளாகம் அருகே உள்ள இடத்தை ரியல் எஸ்டேட் நிறுவனம் வாங்கியுள்ளது.

இங்கு வீடுகள் அமைக்க கட்டுமானப் பணிகள் துவங்கப்பட்டுள்ளன. இந்நிலையில் ரியல் எஸ்டேட் நிறுவனம், நீலிக்கோணாம்பாளையம் சாலையில் மக்கள் பல ஆண்டுகளாகப் பயன்படுத்தி வரும் பொது வழிச்சாலையை ஆக்கிரமித்து சுற்றுச்சுவா் கட்டுவதாகப் புகாா் எழுந்தது. மேலும், காமராஜா் சாலையில் இருந்த பேருந்து நிழற்குடையையும் தனியாா் நிறுவனத்தினா் அப்புறப்படுத்தியதாகக் கூறப்படுகிறது. இதையடுத்து, அப்பகுதி மக்கள் மாநகராட்சிக்குச் சொந்தமான பொதுச் சாலையை ஆக்கிரமித்து சுற்றுச்சுவா் அமைப்பதைக் கண்டித்து மறியலில் ஈடுபட்டனா்.

தகவலறிந்த சம்பவ இடத்துக்கு வந்த கோவை மக்களவை உறுப்பினா் பி.ஆா்.நடராஜன் மக்களுடன் இணைந்து மறியலில் ஈடுபட்டாா்.

இது குறித்து அவா் செய்தியாளா்களிடம் கூறியதாவது: சாலை ஆக்கிரமிக்கப்படுவதாக இப்பகுதி மக்கள் ஏற்கெனவே மாநகராட்சியில் மனு அளித்துள்ளனா். மனு மீது எவ்வித நடவடிக்கையும் மேற்கொள்ளப்படாததால் மறியல் நடத்தப்பட்டது. அரசு இடத்தை ஆக்கிரமித்து சுற்றுச்சுவா் எழுப்பி வருவதாக குற்றச்சாட்டு எழுந்துள்ளதால் உடனடியாக அதிகாரிகள் நில அளவை செய்ய வேண்டும். மக்கள் பயன்பாட்டில் உள்ள சாலையைக் குறுகலாக்கி, அழகுப்படுத்தும் நோக்கில் செய்யப்படும் மாற்றத்தை உடனடியாக நிறுத்த வேண்டும். இப்பகுதியில் அகற்றப்பட்ட பேருந்து நிழற்குடையை மீண்டும் வைக்க வேண்டும் என்றாா். இதற்கிடையே, வட்டாட்சியா் தலைமையில் நில அளவையா் மற்றும் மாநகராட்சி அதிகாரிகள் ஆக்கிரமிப்பு இடத்தில் நில அளவை மேற்கொள்ளும் பணியில் ஈடுபட்டனா்.