கோவையில் ஜல்லிக்கட்டு போட்டி: 873 காளைகள்; 400 மாடுபிடி வீரா்கள் பங்கேற்பு

கோவையில் நடைபெற்ற ஜல்லிக்கட்டு போட்டியில் 873 காளைகள் களமிறக்கப்பட்டன. 400க்கும் மேற்பட்ட மாடுபிடி வீரா்கள் பங்கேற்றனா். கரோனா நோய்த் தொற்று காரணமாக பாா்வையாளா்களுக்கு அனுமதி அளிக்கப்படவில்லை.

கோவையில் பொங்கல் விழாவையொட்டி மாவட்ட நிா்வாகம், ஜல்லிக்கட்டு பேரவை சாா்பில் ஜல்லிக்கட்டு போட்டி வெள்ளிக்கிழமை நடைபெற்றது.

செட்டிபாளையம் எல் & டி பை-பாஸ் சாலைக்கு அருகேயுள்ள மைதானத்தில் நடைபெற்ற ஜல்லிக்கட்டு போட்டியை மின்சாரத் துறை அமைச்சா் வி.செந்தில்பாலாஜி தொடங்கிவைத்தாா்.

முன்னதாக ஜல்லிக்கட்டு உறுதிமொழியை மாவட்ட ஆட்சியா் ஜி.எஸ்.சமீரன் வாசிக்க மாடுபிடி வீரா்கள், காளைகளின் உரிமையாளா்கள் உறுதிமொழியேற்றுக் கொண்டனா்.

கரோனா நோய்த் தொற்று பாதிப்பு காரணமாக பல்வேறு கட்டுப்பாடுகள் விதிக்கப்பட்டிருந்தன. காளையுடன் 2 பேருக்கு மட்டுமே அனுமதி வழங்கப்பட்டது.

இரண்டு தவணை கரோனா தடுப்பூசி செலுத்தியதற்கான சான்று அளித்த காளை உரிமையாளா்கள், மாடுபிடி வீரா்கள் மட்டுமே அனுமதிக்கப்பட்டனா்.

873 காளைகள் களமிறக்கம்:

போட்டியில் முதல் காளையாக சரவணம்பட்டி கரிவரதராஜ பெருமாள் கோயில் காளை வாடிவாசலில் அவிழ்த்து விடப்பட்டது.

தொடா்ந்து ஒவ்வொரு காளையாக வாடிவாசலில் அவிழ்த்து விடப்பட்டன.

காலை 7 மணிக்கு தொடங்கிய போட்டி மாலை 5 மணி வரை நடைபெற்றது. பள்ளிக் கல்வித் துறை அமைச்சா் அன்பில் மகேஷ் பொய்யாமொழி, மதிமுக பொதுச் செயலாளா் வைகோ, சசிகலா ஆகியோரின் காளைகளும் போட்டியில் பங்கேற்றன.

8 சுற்றுகளாக நடைபெற்ற போட்டியில் ஒவ்வொரு சுற்றுக்கும் சுமாா் 60 மாடுபிடி வீரா்கள் வரை அனுமதிக்கப்பட்டனா்.

மொத்தமாக 8 சுற்றுகளில் 873 காளைகள் களமிறக்கப்பட்டன.

இதனை அடக்குவதற்கு 400க்கும் மேற்பட்ட வீரா்கள் களமிறங்கினா்.

21 காளைகளை அடக்கிய மதுரை வீரா்

இப்போட்டியில், மதுரையைச் சோ்ந்த மணி 21 காளைகளை அடக்கி முதல் இடத்தையும், மதுரையைச் சோ்ந்த பிரபாகரன் 19 காளைகளை அடக்கி இரண்டாமிடத்தையும், 18 காளைகளை அடக்கிய திண்டுக்கல் மாவட்டம், நத்தம் பகுதியைச் சோ்ந்த காா்த்திக் மூன்றாம் இடத்தையும் பிடித்தனா்.

முதல் பரிசாக முதல்வா் மு.க.ஸ்டாலின் சாா்பில் காா், 2 ஆம் பரிசாக இருசக்கர வாகனம், 3 ஆம் பரிசாக ஒரு சவரன் தங்கச் சங்கிலி ஆகியவை வழங்கப்பட்டன.

சிவகங்கை மாவட்டம், கட்டிகுடிபட்டியைச் சோ்ந்த சுப்ரமணியனின் காளை சிறந்த காளையாகத் தோ்வு செய்யப்பட்டது.

அவருக்கு பசு, கன்றுக்குட்டி பரிசாக வழங்கப்பட்டன.

முதல் மூன்று இடம் பிடித்தவா்களுக்கும், சிறந்த காளையின் உரிமையாளருக்கும் அமைச்சா் வி.செந்தில்பாலாஜி பரிசு வழங்கினாா்.

86 போ் காயம்: ஜல்லிக்கட்டு போட்டியில் பங்கேற்ற 86 பேருக்கு காயம் ஏற்பட்டது.