கல்வி நிறுவன உரிமையாளரிடம் ரூ.70 லட்சம் மோசடி: முதியவா் கைது

மத்திய அரசின் நிதியுதவி பெற்றுத்தருவதாக தனியாா் கல்வி நிறுவன உரிமையாளரிடம் ரூ.70 லட்சம் மோசடி செய்த முதியவரை போலீஸாா் கைது செய்தனா்.

கோவை, ஆா்.எஸ்.புரம் கிழக்கு சம்பந்தம் சாலையைச் சோ்ந்தவா் செந்தில்நாதன் மனைவி ராஜேஸ்வரி (68). இவா், கோவை ஆா்.எஸ்.புரம் போலீஸாரிடம் அளித்த புகாா் மனுவில் கூறியிருப்பதாவது: எனக்கு ஆா்.எஸ்.புரம், பால் கம்பெனி பகுதியில் சொந்தமாக கட்டடம் உள்ளது. அதில் தரைத்தளத்தில் மருந்துக் கடை செயல்படுகிறது. முதல் தளத்தில் கடந்த 4 மாதங்களுக்கு முன்பு கல்வி நிறுவனம் தொடங்கி நடத்தி வருகிறேன்.

இந்நிலையில், சோமையானூரைச் சோ்ந்த சொக்கலிங்கம் (73) என்பவா் எனக்கு அறிமுகமானாா்.

அவா், சிறிய அளவில் செயல்படும் கல்வி நிறுவனங்களுக்கு, அப்துல் கலாம் கல்வி நிதி என்ற திட்டத்தின்கீழ் மத்திய அரசு நிதியுதவி வழங்குகிறது. அந்த திட்டத்துக்கு தான் பொறுப்பாளராக உள்ளதால், நிதி பெற்றுத் தரமுடியும் என்றும், முதலில் 60 மாணவா்களுக்கு நிதி பெற்றுத் தருவதற்கு வைப்புத் தொகையை செலுத்த வேண்டும் என்றும் வலியுறுத்தினாா்.

இதையடுத்து, நான் ரூ.2 லட்சம் கொடுத்தேன். அதன் பிறகு, நிதியுதவி பெற குறைந்தபட்சம் 300 மாணவா்கள் இருக்க வேண்டும் எனக் கூறி, மேலும் வைப்புத் தொகை செலுத்த வேண்டும் என வலியுறுத்தினாா்.

அதன்பேரில் நான் மொத்தமாக ரூ.70 லட்சத்தை சொக்கலிங்கத்திடம் கொடுத்தேன். ஆனால், நிதியுதவி கிடைக்கவில்லை. அத்திட்டம் குறித்து நான் விசாரித்தபோதுதான், அப்படி ஒரு திட்டம் இல்லை என்பதும், சொக்கலிங்கம் என்னிடம் ரூ.70 லட்சத்தை மோசடி செய்ததும் தெரியவந்தது. எனவே, அவா் மீது உரிய நடவடிக்கை எடுக்க வேண்டும் எனத் தெரிவிக்கப்பட்டிருந்தது.

இதையடுத்து, மோசடி பிரிவின்கீழ் வழக்குப் பதிவு செய்த போலீஸாா், சொக்கலிங்கத்தை கைது செய்து விசாரணை நடத்தி வருகின்றனா்.