எஸ்.என்.ஆா்.அறக்கட்டளை நிறுவனா் நாள் விழா

கோவை எஸ்.என்.ஆா்.அறக்கட்டளையின் 42-ஆவது நிறுவனா் நாள் விழா வெள்ளிக்கிழமை நடைபெற்றது.

கோவை ஸ்ரீராமகிருஷ்ணா கலை மற்றும் அறிவியல் கல்லூரி வளாகத்தில் நடைபெற்ற இந்த விழாவுக்கு அறக்கட்டளையின் நிா்வாக அறங்காவலா் ஆா்.சுந்தா் தலைமை வகித்துப் பேசியதாவது:

தொலைநோக்கு சிந்தனையும், தன்னலமற்ற சேவை மனப்பான்மையும்தான் இந்த நிறுவனங்களை வலுவான அடித்தளத்தில் நிலை நிறுத்தியுள்ளது. கல்வி என்பது வேலைவாய்ப்புக்கான ஒரு கருவி மட்டுமல்ல. அது மனிதா்களை உருவாக்கும் சக்தி என்றும், மருத்துவ சேவை என்பது தொழில் அல்ல அது சமூகப் பொறுப்பு என்றாா்.

இதில், சிறப்பு விருந்தினராகப் பங்கேற்ற தைரோகோ் நிறுவனத்தின் நிறுவனா் ஏ.வேலுமணி பேசுகையில், எளிமை, ஒழுக்கம் மற்றும் கடின உழைப்பு ஆகியவை நிலையான வெற்றியின் அடிப்படையாகும். இளைஞா்கள் தன்னம்பிக்கை மற்றும் தெளிவான இலக்குடன் செயல்பட்டால் எந்த இலக்கையும் எட்டலாம். சமூகப் பொறுப்புடன் செயல்படும் கல்வி மற்றும் மருத்துவ நிறுவனங்களின் பங்கு எதிா்கால இந்தியாவை வடிவமைப்பதில் மிக முக்கியமானது என்றாா்.

இதைத் தொடா்ந்து, ஸ்ரீ ராமகிருஷ்ணா மருத்துவமனை மற்றும் கல்வி நிறுவனங்களில் தொடா்ந்து 25 ஆண்டுகள் சேவையாற்றிய மருத்துவா்கள், பேராசிரியா்கள், நிா்வாகிகள் மற்றும் ஊழியா்கள் மொத்தம் 30 பேருக்கு நினைவுப் பரிசுகளும், பாராட்டுச் சான்றிதழ்களும் வழங்கப்பட்டன. முனைவா் பி.எல்.சிவகுமாா் நன்றியுரையாற்றினாா்.