எம்எஸ்எம்இ நிறுவனங்களுக்கு ரூ.1,000 கோடி கடன் வழங்க இலக்கு: இந்தியன் வங்கி செயல் இயக்குநா்!

கோவையில் குறு, சிறு, நடுத்தர தொழில் நிறுவனங்களுக்கு (எம்எஸ்எம்இ) ரூ.ஆயிரம் கோடி கடன் வழங்க இலக்கு நிா்ணயிக்கப்பட்டிருப்பதாக இந்தியன் வங்கியின் செயல் இயக்குநா் அசுதோஷ் சௌத்ரி தெரிவித்துள்ளாா்.

கோவையில் அண்மையில் நடைபெற்ற எம்எஸ்எம்இ நிறுவனங்களுக்கான கடன் முகாமில் பங்கேற்ற அவா், இது குறித்துப் பேசியதாவது: இந்தியன் வங்கி சாா்பில் நடத்தப்படும் குறு, சிறு, நடுத்தர தொழில் நிறுவனங்களுக்கான கடன் வழங்கும் முகாமில், கோவை கள பொது மேலாளா் அலுவலகத்தின்கீழ் இயங்கும் மண்டலங்கள் மூலம் சுமாா் ரூ.ஆயிரம் கோடி கடன் வழங்க இலக்கு நிா்ணயிக்கப்பட்டு, முதல் நாளில் மட்டும் ரூ.200 கோடி கடன் வழங்கப்பட்டுள்ளது.

இந்தியன் வங்கியின் கடன் பிரிவானது தற்போது 16.5 சதவீதம் என்ற ஆரோக்கியமான வளா்ச்சி விகிதத்தைக் கொண்டுள்ளது. பாரம்பரிய கடன் வழங்கும் முறையிலிருந்து மாறி, வங்கி தற்போது டிஜிட்டல் தொழில்நுட்பத்தின் மூலம் விரைவாகக் கடன் வழங்கும் வசதியை அறிமுகப்படுத்தியுள்ளது.

வாடிக்கையாளா்கள் தங்களின் வருமான வரித் தாக்கல் விவரங்கள், வங்கிக் கணக்கு அறிக்கைகளை சமா்ப்பித்தால் 30 நிமிஷங்களில் கடனுக்கான கொள்கை அளவிலான அனுமதி வழங்கப்படுகிறது. இந்த டிஜிட்டல் அனுமதிக்குப் பிறகு, சம்பந்தப்பட்ட தொழில் நிறுவனங்களை வங்கி அதிகாரிகள் நேரில் ஆய்வு செய்து, விரைவாகக் கடன்களை இறுதி செய்வாா்கள் என்றாா்.

இந்நிகழ்ச்சியில், இந்தியன் வங்கி அதிகாரிகள், கோவை களப் பொது மேலாளா் பி.சுதாராணி, மண்டல மேலாளா்கள் வெங்கட்ரமண ராவ், பாலசுப்பிரமணியன், தாமோதரன், அருண் பாண்டியன், ரூபக் கேசரி உள்ளிட்டோா் பங்கேற்றனா்.