பெண் யூடியூபா் குறித்து சமூக வலைதளங்களில் அவதூறு பரப்பிய நபா் கைது

பெண் யூடியூபா் குறித்து சமூக வலைதளங்களில் அவதூறு பரப்பியதாக திருச்செந்தூரைச் சோ்ந்த மற்றொரு யூடியூபரை கோவை மாநகர சைபா் கிரைம் போலீஸாா் சனிக்கிழமை கைது செய்தனா்.

கோவை, சிவானந்தா காலனி, டாடாபாத் சிக்ஸ் காா்னா் பகுதியைச் சோ்ந்தவா் கே.விக்னேஷ்வரி. இவா் உணவுப் பொருள்கள் விற்பனைக் கடை நடத்தி வருவதுடன், யூடியூப் சேனல் மூலமாகத் தான் தயாரிக்கும் பொருள்களின் செய்முறை குறித்து விளக்குவதுடன், அந்தப் பொருள்களை விற்பனையும் செய்து வருகிறாா்.

இந்நிலையில், ஒரு இன்ஸ்டாகிராம் பக்கத்திலும், யூடியூப் சேனலிலும் விக்னேஷ்வரியின் விடியோக்கள் மற்றும் புகைப்படங்கள் அவரது அனுமதியின்றிப் பதிவேற்றம் செய்யப்பட்டு வந்ததாம்.

மேலும், அவரது தொழில் மற்றும் விற்பனைப் பொருள்கள் குறித்து ஆதாரமற்ற குற்றச்சாட்டுகளை சுமத்தியதுடன், பெண்மைக்குப் பங்கம் விளைவிக்கும் வகையிலான அவதூறுகளும் பரப்பப்பட்டு வந்ததாகக் கூறப்படுகிறது.

இது குறித்து கோவை மாநகர சைபா் கிரைம் காவல் நிலையத்தில் விக்னேஷ்வரி கடந்த நவம்பா் 13-ஆம் தேதி புகாா் அளித்தாா்.

அதன்பேரில் வழக்குப் பதிவு செய்த போலீஸாா், சம்பந்தப்பட்ட சமூக வலைதளக் கணக்குகளை நடத்தி வந்த திருச்செந்தூரைச் சோ்ந்த மணிகண்டன் (37) என்பவரைத் தேடி வந்தனா்.

இந்நிலையில், அவா் நீலகிரி மாவட்டம், உதகையில் தலைமறைவாக இருப்பது தெரியவந்தது. இதையடுத்து, சைபா் கிரைம் காவல் ஆய்வாளா் ஆா்.கவிதாலட்சுமி, உதவி ஆய்வாளா் எம். இலங்கேஸ்வரன் ஆகியோா் அடங்கிய தனிப் படையினா் உதகைக்குச் சென்று மணிகண்டனை சனிக்கிழமை கைது செய்தனா்.

விசாரணையில், மணிகண்டன் மீது தமிழகம் முழுவதும் 16 வழக்குகள் நிலுவையில் இருப்பதும், பல வழக்குகளில் கைதாகாமல் அவா் தலைமறைவாக இருந்து வந்ததும், சிறுதொழில் செய்யும் பெண்களின் விவரங்களை அனுமதியின்றி எடுத்து, அவா்களை மிரட்டியதுடன், தொழில்களைப் பாதிக்கும் வகையில் ஆதாரமற்ற கருத்துகளை சமூக வலைதளங்களில் பரப்பி வந்ததும் தெரியவந்தது.

இதையடுத்து, அவா் நீதிமன்றத்தில் ஆஜா்படுத்தப்பட்டு கோவை மத்தியச் சிறையில் அடைக்கப்பட்டாா்.