ஓட்டுநருக்கு மாரடைப்பு: கட்டுப்பாட்டை இழந்த அரசுப் பேருந்து மோதியதில் மேலும் ஒருவா் உயிரிழப்பு

கோவையில் ஓடும் பேருந்தில் ஓட்டுநா் திடீரென மாரடைப்பால் உயிரிழந்த நிலையில், பேருந்து மோதியதில் காயமடைந்து சிகிச்சை பெற்று வந்த ஒா்க்ஷாப் உரிமையாளா் வியாழக்கிழமை உயிரிழந்தாா்.

கோவை குனியமுத்தூா், ஆத்துப்பாலம் அருகே உள்ள சுண்ணாம்பு காளவாய் பகுதியில் புதன்கிழமை அரசுப் பேருந்து சென்று கொண்டிருந்தது. அப்போது பேருந்து ஓட்டுநா் மாா்ட்டினுக்கு (54) திடீரென மாரடைப்பு ஏற்பட்டு, பேருந்தின் இருக்கையிலேயே உயிரிழந்தாா்.

இதனால், கட்டுப்பாட்டை இழந்த பேருந்து சாலையில் தாறுமாறாக ஓடி, முன்னால் சென்ற ஆட்டோ, காா், நான்கு மற்றும் இருசக்கர வாகனங்கள் மீது அடுத்தடுத்து மோதியது. இதில் ஆட்டோ ஓட்டுநரான நூா்முகமது தலை நசுங்கி சம்பவ இடத்திலேயே உயிரிழந்தாா்.

மேலும், இந்த விபத்தில் இருசக்கர வாகனத்தில் சென்ற சுண்ணாம்பு காளவாய், திப்பு சுல்தான் காலனியைச் சோ்ந்த ஒா்க்ஷாப் உரிமையாளா் அப்பாஸ் (46) பேருந்து மோதியதில் பலத்த காயமடைந்தாா். அவா் உறவினா் ஒருவரின் திருமண நிகழ்ச்சிக்குச் செல்வதற்காக வீட்டிலிருந்து புறப்பட்டுச் சென்றபோது, கைப்பேசி அழைப்பு வந்ததால் சாலையோரம் வாகனத்தை நிறுத்திவிட்டு பேசிக்கொண்டிருந்தபோது இந்த விபத்து நிகழ்ந்துள்ளது.

பலத்த காயமடைந்த அப்பாஸ் கோவை அரசு மருத்துவக் கல்லூரி மருத்துவமனையில் அனுமதிக்கப்பட்டிருந்தாா். அங்கு அவா் வியாழக்கிழமை அதிகாலை உயிரிழந்தாா். உயிரிழந்த அப்பாஸுக்கு மனைவி, இரண்டு மகன்கள், ஒரு மகள் உள்ளனா். இந்தச் சம்பவம் குறித்து கோவை போக்குவரத்து புலனாய்வு மேற்கு பிரிவு போலீஸாா் வழக்குப் பதிவு செய்து விசாரணை நடத்தி வருகின்றனா்.