லாரியில் தீ விபத்து

கோபி அருகே ஓடும் லாரியில் தீப்பிடித்ததில் லாரி முழுவதும் எரிந்து சேதமடைந்தது.

 கோபி அருகே உள்ள டி.என்.பாளையம் வேட்டுவன்புதூரில் இருந்து கரும்புத் தோகைகளை ஏற்றிக் கொண்டு லாரி ஒன்று சத்தியமங்கலம் நோக்கி வியாழக்கிழமை மாலை சென்று கொண்டிருந்தது. லாரியை சத்தியமங்கலத்தைச் சேர்ந்த சரவணன் (32) என்பவர் ஓட்டிச் சென்றார்.

 சிறிது தூரம் சென்றதும் அப்பகுதியில் உள்ள மின்கம்பி மீது எதிர்பாராத விதமாக லாரி உரசியதில், கரும்புத் தோகையில் தீப்பற்றியுள்ளது. இதைப் பார்த்த பொதுமக்கள் ஓட்டுநரிடம் தெரிவித்துள்ளனர். இதையடுத்து, அவர் லாரியை சாலையோரமாக நிறுத்திவிட்டு இறங்கியுள்ளார்.

 இதுகுறித்து, சத்தியமங்கலம் தீயணைப்பு நிலையத்துக்கு தகவல் தெரிவிக்கப்பட்டது. தகவலறிந்து, சம்பவ இடத்துக்குச் சென்ற தீயணைப்பு வீரர்கள் தீயை அணைத்தனர். ஆனால், லாரி முழுவதும் எரிந்து சேதமடைந்தது.

 இதுதொடர்பாக, பங்களாப்புதூர் போலீஸார் விசாரணை நடத்தி வருகிறன்றனர்.