உலக மருந்தாளுநர் தினம்

உலக மருந்தாளுநர்கள் தினம் ஈரோட்டில் வெள்ளிக்கிழமை கடைப்பிடிக்கப்பட்டது.

 இதையொட்டி, ஈரோடு மாவட்ட மருந்தாளுநர் சங்கம், நந்தா பார்மஸி கல்லூரி சார்பில் விழிப்புணர்வுப் பேரணி ஈரோட்டில் நடைபெற்றது.

 ஈரோடு வ.உ.சி., பூங்கா மைதானத்தில் இருந்து புறப்பட்ட இப்பேரணி சத்தி சாலை வழியாகச் சென்று சிக்கய்ய நாயக்கர் கல்லூரி அருகே நிறைவடைந்தது. இதில், பார்மஸி கல்லூரி மாணவ, மாணவிகள் கலந்துகொண்டனர்.

 ஊர்வலத்தின்போது, பொதுமக்களிடம் விழிப்புணர்வுத் துண்டுப் பிரசுரம் வழங்கப்பட்டது. அதில், காலாவதியான மருந்துகளை தவிர்க்க வேண்டும். மருந்தாளுநர்களின் அறிவுரைப்படி மருந்துகளை உட்கொண்டு பக்க விளைவுகளை தவிர்ப்போம் என்பது போன்ற வாசகங்கள் இடம் பெற்றிருந்தன.

 தொடர்ந்து, ஈரோடு அரசு மருத்துவமனையில் நடைபெற்ற நிகழ்ச்சியில் மாவட்ட மருத்துவப் பணிகளின் இணை இயக்குநர் மணி, ஈரோடு அரசு மருத்துவமனை கண்காணிப்பாளர் வெங்கடேஷ், உறைவிட மருத்துவ அலுவலர் லட்சுமி, மருந்து கிடங்கு அலுவலர் சோமு, நந்தா பார்மஸி கல்லூரி முதல்வர் சிவகுமார், அரசு மருந்தாளுநர் சங்க மாவட்டச் செயலாளர் துரைசாமி, பொருளாளர் குணபால் உள்பட பலர் பங்கேற்றனர்.