கிறிஸ்தவ வழிபாட்டுக் கூடம் முற்றுகை

ஈரோடு அருகே கிறிஸ்தவ மத வழிபாடு நடத்த அப்பகுதி மக்கள் எதிர்ப்புத் தெரிவித்து, வழிபாட்டுக் கூடத்தை முற்றுகையிட முயன்றதால் ஞாயிற்றுக்கிழமை பரபரப்பான சூழல் நிலவியது.  
ஈரோட்டை அடுத்த பச்சப்பாளி சாலை, இந்திரா நகர் பகுதியில் ஒரு வீட்டில் கடந்த இரு வாரங்களாக கிறிஸ்தவ மத வழிபாடு நடத்தப்பட்டு வந்தது. அங்கு வாரந்தோறும் ஞாயிற்றுக்கிழமைகளில் வழிபாடு நடைபெற்ற நிலையில்,  அப்பகுதியைச்  சேர்ந்த பொதுக்கள் திடீர் எதிர்ப்புத் தெரிவித்து முற்றுகைப் போராட்டத்தில்  ஈடுபட்டனர். 
இந்திரா நகர், முதலியார் தோட்டம்,  டாலர்ஸ் காலனி, கங்கா நகர் உள்ளிட்ட பகுதிகளைச் சேர்ந்த பொதுமக்கள் கடந்த சில நாள்களுக்கு முன்னர் இதுதொடர்பாக ஈரோடு தாலுகா காவல் நிலையத்தில் மனு அளித்திருந்தனர். இந்நிலையில், அப்பகுதியைச் சேர்ந்த பொதுமக்கள் வழிபாட்டுக் கூடத்தை முற்றுகையிடத் திரண்டதோடு, மதவழிபாடு நடத்த எதிர்ப்பு தெரிவித்து முழக்கம் எழுப்பினர்.
இதையடுத்து, சம்பவ இடத்துக்கு விரைந்த போலீஸார் முறையான அனுமதி பெறாமல் மத வழிபாடு நடத்தக் கூடாது என அறிவுறுத்தியதோடு, வழிபாட்டுக் கூடத்தை மூடுமாறும் உத்தரவிட்டனர்.  இதையடுத்து, போராட்டத்தில் ஈடுபட்ட பொதுமக்கள் கலைந்து சென்றனர். இதனால், அப்பகுதியில் சிறிது நேரம் பரபரப்பான சூழல் காணப்பட்டது.