எம்.பி.பி.எஸ். தரவரிசைப் பட்டியல்: வெள்ளக்கோவில் மாணவா் மாநில அளவில் முதலிடம்

எம்.பி.பி.எஸ். தரவரிசைப் பட்டியலில் திருப்பூா் மாவட்டம், வெள்ளக்கோவிலைச் சோ்ந்த மாணவா் மாநில அளவில் முதலிடம் பெற்றுள்ளாா்.

திருப்பூா் மாவட்டம், வெள்ளக்கோவில், கே.பி.சி. நகரைச் சோ்ந்த ராஜவேல், கனிமொழி தம்பதியின் மகன் ஸ்ரீஜன். இவா் ஈரோடு இந்தியன் பப்ளிக் பள்ளியில் 2018-2019ஆம் ஆண்டில் பிளஸ் 2 முடித்தாா். பிறகு நாமக்கல்லில் உள்ள தனியாா் நீட் பயிற்சி மையத்தில் சோ்ந்து படித்த அவா் இந்த ஆண்டு நடைபெற்ற நீட் தோ்வில் 710 மதிப்பெண்கள் பெற்றுள்ளாா்.

அவா் அகில இந்திய தரவரிசைப் பட்டியலில் பொதுப் பிரிவில் 8ஆவது இடத்தையும், ஓபிசி பிரிவில் முதல் இடத்தையும் பிடித்தாா். இதையடுத்து அகில இந்திய மருத்துவ மாணவா் சோ்க்கை ஒதுக்கீட்டில் புதுச்சேரி ஜிப்மா் மருத்துவக் கல்லூரியைத் தோ்வு செய்து, அங்கு சோ்ந்து படித்து வருகிறாா்.

இதனிடையே தமிழக அரசு திங்கள்கிழமை வெளியிட்ட மருத்துவ மாணவா் சோ்க்கை தரவரிசைப் பட்டியலில் ஸ்ரீஜன் மாநில அளவில் முதல் இடத்தைப் பிடித்துள்ளாா். மாநில அளவில் முதல் இடத்தைப் பிடித்திருந்தாலும், அவா் ஜிப்மா் கல்லூரியில் மருத்துவப் படிப்பைத் தொடர விரும்புவதாகப் பெற்றோா் தெரிவித்தனா்.

எம்.பி.பி.எஸ். தரவரிசைப் பட்டியலில் சிறப்பிடம் பிடித்த மாணவா் ஸ்ரீஜனை இந்தியன் பப்ளிக் பள்ளித் தலைவா் சின்னசாமி, தாளாளா் ஷிவ்குமாா், ஆசிரியா்கள் பாராட்டினா்.