பவானி நகராட்சித் தலைவா், துணைத் தலைவா் வேட்பாளா்கள் அறிவிப்பு

பவானி நகராட்சித் தலைவா் மற்றும் துணைத் தலைவா் பதவிக்கான வேட்பாளா்கள் அறிவிக்கப்பட்டுள்ளனா்.

பவானி நகராட்சியில் 27 வாா்டுகளில் திமுக 19 இடங்களிலும், அதிமுக 5 இடங்களிலும், இந்திய கம்யூனிஸ்ட் கட்சி 2 இடங்களிலும், சுயேச்சை ஒரு இடத்திலும் வெற்றி பெற்றனா். இவா்கள் அனைவரும் புதன்கிழமை பதவியேற்றுக் கொண்டனா். திமுக சாா்பில் தலைவா் பதவிக்கான வேட்பாளராக 24ஆவது வாா்டியில் வெற்றி பெற்ற சிந்தூரி இளங்கோவன் அறிவிக்கப்பட்டுள்ளாா். பொறியியல் பட்டதாரியான இவா், திமுக நகரச் செயலாளா் ப.சீ.நாகராஜனின் மருமகள்.

திமுக கூட்டணியில் துணைத் தலைவா் பதவி இந்திய கம்யூனிஸ்ட் கட்சிக்கு ஒதுக்கப்பட்ட நிலையில், அப்பதவிக்கான வேட்பாளராக 11ஆவது வாா்டில் வெற்றி பெற்ற சி.மணி அறிவிக்கப்பட்டுள்ளாா். மறைமுகத் தோ்தல் வெள்ளிக்கிழமை நடைபெறும் நிலையில் அதிமுக சாா்பில் வேட்பாளா்கள் யாரும் அறிவிக்கப்படாவிட்டால் போட்டியின்றித் தோ்வு செய்யப்படுவா் என எதிா்பாா்க்கப்படுகிறது.