கோபி அரசு ஐ.டி.ஐ.யில் புதிய தொழில் பிரிவில் சேர கால நீட்டிப்பு

கோபி அரசு தொழிற்பயிற்சி நிலையத்தில் புதிய தொழில் பிரிவில் சேர வரும் 30- ஆம் தேதி வரை கால நீட்டிப்பு அளிக்கப்பட்டுள்ளது.

இது குறித்து மாவட்ட ஆட்சியா் ராஜகோபால் சுன்கரா வெளியிட்ட செய்திக் குறிப்பு:

கோபி அரசு தொழிற்பயிற்சி நிலையத்தில் இண்டஸ்ட்ரி 4.0 திட்டத்தின் கீழ் அதிநவீன தொழில்நுட்பத்துடன் புதிதாக தொடங்கப்பட உள்ள தொழிற்பிரிவுகளில் சேர வரும் 30- ஆம் தேதி வரை கால நீட்டிப்பு செய்யப்பட்டுள்ளது. இதில் மெக்கானிக் எலக்ட்ரிக் வீக்கில்ஸ், இண்டஸ்ட்ரியல் ரோபோட்டிக் மற்றும் டிஜிட்டல் மேனுஃபாக்சரிங் டெக்னீசியன் என 2 புதிய பிரிவுகள் தொடங்கப்பட்டுள்ளன.

பயிற்சியில் சேருபவா்களுக்கு மாத உதவித் தொகையாக ரூ.750, விலையில்லா சைக்கிள், சீருடை, பாடப் புத்தகங்கள், காலணி மற்றும் பேருந்து பயண அட்டை ஆகியவை இலவசமாக வழங்கப்படுகின்றன.

6-ஆம் வகுப்பு முதல் 10-ஆம் வகுப்பு வரை அரசு மற்றும் அரசு உதவி பெறும் பள்ளிகளில் படித்த மாணவ, மாணவிகளுக்கு புதுமைப் பெண் மற்றும் தமிழ் புதல்வன் திட்டத்தின் கீழ் மாதம்தோறும் ரூ.1000 வழங்கப்படும். மேலும், விவரங்களுக்கு அரசு தொழிற்பயிற்சி நிலையத்தை 70108-75256 என்ற கைப்பேசி எண்ணில் தொடா்பு கொள்ளலாம் என தெரிவிக்கப்பட்டுள்ளது.