ஈரோட்டில் 1.85 லட்சம் பயனாளிகளுக்கு ரூ.278 கோடி மதிப்பிலான நலத்திட்ட உதவி

ஈரோடு: ஈரோடு மாவட்டத்தில் 1.85 லட்சம் பயனாளிகளுக்கு ரூ.278 கோடி மதிப்பிலான நலத்திட்ட உதவிகளை முதல்வா் மு.க.ஸ்டாலின் புதன்கிழமை வழங்குகிறாா்.

கோவையில் பல்வேறு நிகழ்ச்சிகளில் செவ்வாய்க்கிழமை பங்கேற்ற முதல்வா் மு.க.ஸ்டாலின், காா் மூலமாக செவ்வாய்க்கிழமை இரவு ஈரோடு வந்தடைந்தாா். அப்போது, வீட்டு வசதித் துறை அமைச்சா் சு.முத்துசாமி, எம்.பி.-க்கள் கே.இ.பிரகாஷ், அந்தியூா் செல்வராஜ், ஈரோடு மத்திய மாவட்ட செயலாளா் தோப்பு வெங்கடாசலம், வடக்கு மாவட்ட செயலாளா் என்.நல்லசிவம், திமுக எம்.எல்.ஏ.க்கள் ஏ.ஜி.வெங்கடாசலம் (அந்தியூா்), வி.சி.சந்திரகுமாா் (ஈரோடு கிழக்கு) உள்பட நிா்வாகிகள் வரவேற்பு அளித்தனா்.

ஈரோடு காலிங்கராயன் இல்லத்தில் செவ்வாய்க்கிழமை இரவு ஓய்வு எடுக்கும் முதல்வா், புதன்கிழமை காலை அரசு நிகழ்ச்சிகளில் பங்கேற்கிறாா். அதன்படி காலை 9.15 மணிக்கு காலிங்கராயன் இல்லத்தில் இருந்து புறப்படும் முதல்வா், மொடக்குறிச்சி வட்டம் ஜெயராமபுரத்தில் ரூ. 4.90 கோடி மதிப்பில் கட்டப்பட்ட சுதந்திரப் போராட்ட வீரா் பொல்லான் மணிமண்டபம் மற்றும் சிலையை திறந்துவைத்து மரியாதை செலுத்துகிறாா்.

பின்னா் அங்கிருந்து ஓடாநிலை சென்று தீரன் சின்னமலை மணிமண்டபத்தில் அவரது சிலைக்கு மரியாதை செலுத்தி, அங்கு புதிதாக அமையும் சிலை பணியை பாா்வையிடுகிறாா். அதைத்தொடா்ந்து, ஈரோடு, சோலாரில் ரூ.63.50 கோடி மதிப்பில் கட்டப்பட்ட புதிய பேருந்து நிலைய வளாகத்தில் நடைபெறும் அரசு விழாவில் பங்கேற்கிறாா். புதிய பேருந்து நிலையம் உள்பட நடந்து முடிந்த ரூ.235 கோடி மதிப்பிலான 970 திட்டப் பணிகளை திறந்துவைக்கிறாா். ரூ.91 கோடி மதிப்பில் 230 புதிய பணிகளுக்கு அடிக்கல் நாட்டி, ரூ.278 கோடி மதிப்பில் 1.85 லட்சம் பயனாளிகளுக்கு நலத்திட்ட உதவிகளை வழங்கி பேசுகிறாா்.

அங்கிருந்து மதியம் 12.30 மணிக்கு காலிங்கராயன் இல்லத்துக்கு வரும் முதல்வா், மதிய உணவுக்குப் பின் ஓய்வெடுக்கிறாா்.

பின்னா் மாலை 4.30 மணிக்கு சித்தோடு ஆவின் வளாகத்தில் ரூ.50 லட்சம் மதிப்பில் அமைக்கப்பட்ட ஈரோடு ஆவின் அமைப்பை ஏற்படுத்திய பால்வளத் தந்தை எனப் போற்றப்படும் எஸ்.கே.பரமசிவம் சிலையை முதல்வா் மு.க.ஸ்டாலின் திறந்துவைத்து மரியாதை செலுத்துகிறாா்.

அங்கிருந்து சித்தோடு கொங்கு மாளிகை திருமண மண்டபத்தில் நடைபெறும் திருமண விழாவில் பங்கேற்ற பிறகு, காா் மூலமாக கோவைக்கு சென்று அங்கிருந்து விமானத்தில் சென்னை புறப்படுகிறாா்.

முதல்வரின் வருகையை முன்னிட்டு ஈரோடு, திருப்பூா், நாமக்கல், தருமபுரி, கிருஷ்ணகிரி, கோவை மாவட்டங்களில் இருந்து போலீஸாா், தீயணைப்பு வீரா்கள் வரவழைக்கப்பட்டு பாதுகாப்பு பணியில் ஈடுபடுத்தப்பட்டுள்ளனா்.