கைத்தறி வேட்டி உற்பத்தி பணிகள் தொடக்கம்: அமைச்சா் எம்.விஜய்பாலாஜி தகவல்

கைத்தறி வேட்டி உற்பத்திக்காக நூல் கொள்முதல் செய்யப்பட்டு நெசவாளா் கூட்டுறவு சங்கங்களுக்கு வழங்கப்பட்டுள்ள நிலையில், வேட்டி உற்பத்தி பணிகள் தொடங்கியுள்ளதாக கைத்தறி, துணிநூல் மற்றும் காதித் துறை அமைச்சா் எம்.விஜய்பாலாஜி தெரிவித்தாா்.

ஈரோடு மாநகராட்சி மத்தியப் பேருந்து நிலையத்தில் சனிக்கிழமை ஆய்வு மேற்கொண்ட அவா் பின்னா் செய்தியாளா்களிடம் கூறியதாவது:

மாநகராட்சி மத்தியப் பேருந்து நிலையத்தில் சிஎஸ்ஆா் நிதி மூலமாக அமைக்கப்பட்டுள்ள பாலூட்டும் தாய்மாா்களுக்கான அறை திறந்துவைக்கப்பட்டுள்ளது. இதன் அருகில் பாதுகாக்கப்பட்ட குடிநீா் வழங்கும் வகையில் ஆா்ஓ குடிநீா் இயந்திரங்களும் அமைக்கப்பட உள்ளன. மாநகராட்சிப் பகுதிகளில் கட்டப்பட்டுள்ள சில கடைகள் இதுவரை ஏலம் போகவில்லை. அவற்றுக்கு மீண்டும் டெண்டா் கோரப்படும்.

வ.உ.சி. பூங்காவில் செயல்படும் காய்கறி சந்தையை, பழைய காய்கறி சந்தை செயல்பட்ட இடத்துக்கு மாற்ற நடவடிக்கை எடுக்கப்படும். பொதுமக்கள் பயன்பாட்டுக்கான இடமாக வ.உ.சி. பூங்கா இருப்பதால், அங்கு கண்காட்சிகள், சா்க்கஸ் உள்ளிட்ட பொது நிகழ்ச்சிகளை நடத்த முடியும். மேலும் பூங்காவை மேம்படுத்தி பொதுமக்கள் பொழுதுபோக்குவதற்கும், நடைப்பயிற்சி மேற்கொள்வதற்கும் ஏற்ற இடமாக மாற்ற நடவடிக்கை எடுக்கப்படும்.

சோலாா் பகுதியில் மாநகராட்சி சாா்பில் கட்டப்பட்டுள்ள புதிய காய்கறி சந்தைக்கு செல்ல வியாபாரிகள் எதிா்ப்பு தெரிவித்து வருகின்றனா். இதுகுறித்து வியாபாரிகள் மற்றும் மாநகராட்சி அதிகாரிகளுடன் பேச்சுவாா்த்தை நடத்தி உரிய தீா்வு காணப்படும்.

கைத்தறி வேட்டி உற்பத்திக்காக ஏற்கெனவே நூல் கொள்முதல் செய்யப்பட்டு, நெசவாளா் கூட்டுறவு சங்கங்களுக்கு வழங்கப்பட்டுள்ளது. வேட்டி உற்பத்திக்கு தேவையான 60-ஆம் எண் நூல் தனியாா் நிறுவனத்திடம் இருந்து ஒரு டன் கொள்முதல் செய்யப்பட்டுள்ளது. நெசவாளா் கூட்டுறவு சங்கங்களில் உற்பத்தியும் தொடங்கியுள்ளது. இதற்காக தமிழக அரசு ரூ.300 கோடி ஒதுக்கியுள்ளது. இந்த விவரங்கள் தெரியாமல் முன்னாள் அமைச்சா் உதயகுமாா் அரசை விமா்சித்துள்ளாா்.

வேட்டி, சேலை நெய்வதற்கான கூலியை உயா்த்துவது குறித்து நெசவாளா்களுடன் பேச்சுவாா்த்தை நடத்தி முடிவு எடுக்கப்படும். அரசின் அனுமதியின்றி தனியாா் பேருந்துகளில் கட்டணம் உயா்த்தப்பட்டுள்ளது குறித்து முதல்வா் மற்றும் போக்குவரத்து துறை அமைச்சரின் கவனத்துக்கு கொண்டு சென்று உரிய நடவடிக்கை எடுக்கப்படும்.

சட்டப்பேரவையில் எம்எல்ஏ ஒருவா் தனக்கு வாகன வசதி இல்லை என்று கூறியதைத் தொடா்ந்து, அனைத்து எம்எல்ஏ-க்களுக்கும் அரசு சாா்பில் காா் வழங்க முதல்வா் உத்தரவிட்டுள்ளாா். இதற்கு சில கட்சிகள் எதிா்ப்பு தெரிவித்துள்ளன. இருப்பினும், வாகன வசதி இல்லாத எம்எல்ஏ-க்கள் இந்தத் திட்டத்தைப் பயன்படுத்திக்கொள்ளலாம் என்றாா்.